കേരള ടീമിന് മഞ്ചേരിയിൽ ഉജ്ജ്വല സ്വീകരണം
സന്തോഷ് ട്രോഫി ഫുട്ബോള് ചാമ്പ്യന്‍ഷിപ്പിനുള്ള കേരള ടീം മഞ്ചേരിയിലെത്തി. ഇന്ന് (ഏപ്രിൽ 13) രാവിലെ 11.30 ന് കോഴിക്കോട് 20 അംഗ ടീം പ്രഖ്യാപനത്തിന് ശേഷം ഉച്ചകഴിഞ്ഞ് മൂന്നോടെ ടീം മഞ്ചേരിയിലേക്ക് തിരിച്ചു. 5.30 യോടെ മഞ്ചേരിയിലെത്തിയ ടീമിന് അഡ്വ. യു.എ. ലത്തീഫ് എം.എല്‍.എ.യുടെ നേതൃത്വത്തില്‍ ഗംഭീര സ്വീകരണമായിരുന്നു ഒരുക്കിയത്. ചെണ്ട വാദ്യമേളങ്ങളോട് കൂടി ഒരുക്കിയ സ്വീകരണത്തില്‍ കേരളാ ടീമിന് ആവേശം പകരാന്‍ വന്‍ജനാവലിയായിരുന്നു മഞ്ചേരിയിലെത്തിയത്. പരിപാടിയില്‍ മഞ്ചേരി നഗരസഭാ ചെയര്‍പേഴ്‌സണ്‍ വി.എം. സുബൈദ, വൈ. ചേയര്‍പേഴ്സണ്‍ അഡ്വ. ബീന ജോസഫ്, പ്രതിപക്ഷ നേതാവ് സജിത്ത് ബാബു, ജില്ലാ സ്പോര്ട്സ് കൗണ്‍സില്‍ എക്‌സിക്യുറ്റീവ് അംഗങ്ങളായ കെ. മനോഹരകുമാര്‍, കെ.എ. നാസര്‍, രവി കുമാര്‍, ബിബിന്‍ ശങ്കര്‍, കൗണ്‍സിലര്‍മാര്‍, മഞ്ചേരിയിലെ ഫുട്ബോള്, ബാസ്‌ക്കറ്റ്‌ബോള്‍ അക്കാദമി കുട്ടികളും പങ്കെടുത്തു.
ഏപ്രില്‍ 16ന് രാത്രി എട്ടിന് രാജസ്ഥാനെതിരെ മഞ്ചേരി പയ്യനാട് സ്റ്റേഡിയത്തിലാണ് കേരളത്തിന്റെ ആദ്യ മത്സരം. 18 ന് കേരളം കരുത്തരായ വെസ്റ്റ് ബംഗാളിനെ നേരിടും. 20 ന് മേഘാലയ, 22 ന് പഞ്ചാബ് എന്നിവരുമായി കേരളം ഏറ്റുമുട്ടും. കേരളത്തിന്റെ എല്ലാ മത്സരങ്ങളും മഞ്ചേരി പയ്യനാട് സ്റ്റേഡിയത്തിലാണ് നടക്കുന്നത്.കേരളത്തിന് പുറമെ പഞ്ചാബ്, മണിപ്പൂര്‍, ഒഡീഷ്യ, രാജസ്ഥാന്‍, മേഘാലയ, വെസ്റ്റ് ബംഗാള്‍ ടീമുകളും കേരളത്തിലെത്തി. ഗുജറാത്ത്, കര്‍ണാടക, നിലവിലെ ചാമ്പ്യന്‍മാരായ സര്‍വീസസ് എന്നിവര്‍ നാളെ (ഏപ്രിൽ 14) എത്തും.
സന്തോഷ് ട്രോഫി: ടീമുകള്‍ക്ക് സ്വീകരണം നല്‍കി
സന്തോഷ് ട്രോഫി ഫുട്ബോള് ചാമ്പ്യന്‍ഷിപ്പിന് ദിവസങ്ങള്‍ മാത്രം ബാക്കി നില്‍ക്കെ മത്സരത്തിന് എത്തിയ ടീമുകള്‍ക്ക് സംഘാടക സമിതി സ്വീകരണം നല്‍കി. ഇന്ന് (ഏപ്രില്‍ 13) രാവിലെ 7.30 ന് കോഴിക്കോട് വിമാനത്താവളത്തിലെത്തിയ മണിപ്പൂര്‍ ടീമിനെ ബാന്റ് മേളത്തിന്റെ അകമ്പടിയോടെ ബൊക്കയും പൂവും നല്‍കി സംഘാടക സമിതി ഭാരവാഹികളും കായിക പ്രേമികളും ചേര്‍ന്ന് സ്വീകരിക്കുകയായിരുന്നു.
സ്വീകരണത്തിന് മാറ്റുകൂട്ടാന്‍ കൊണ്ടോട്ടിയിലെ ഫുട്ബോള് അക്കാദിയിലെ കുട്ടികളുമുണ്ടായിരുന്നു. സ്വീകരണ ചടങ്ങില്‍ കോഴിക്കോട് ടെര്‍മിനല്‍ മാനേജര്‍ ദിലീപ്, റിസെപ്ഷന്‍ കമ്മിറ്റി ചെയര്‍മാന്‍ അഡ്വ. ബീന ജോസഫ്, വൈസ് ചെയര്‍മാന്‍ സജിത്ത് ബാബു, കണ്‍വീനര്‍ കെ. മനോഹരകുമാര്‍, ജില്ലാ സ്പോര്ട്സ് കൗണ്‍സില്‍ എക്സിക്യൂട്ടീവ് അംഗങ്ങളായ സി. സുരേഷ്, പി. ഹൃഷികേഷ് കുമാര്‍, ഗ്രൗണ്ട് ആന്റ് എക്യുപ്മെന്റ് കമ്മിറ്റി കണ്‍വീനര്‍ കെ.പി അജയരാജ്, പി.പി സജന്‍ദാസ്, വി.പി സുധീര്‍, മറ്റ് സംഘാടക സമിതി അംഗങ്ങള്‍, കായിക പ്രേമികള്‍ തുടങ്ങിയവരും പങ്കെടുത്തു. ഇന്നലെ (ഏപ്രില്‍ 13) പുലര്‍ച്ചെ പഞ്ചാബാണ് ആദ്യം എത്തിയത്. പുലര്‍ച്ചെ രണ്ടിന് കോഴിക്കോട് റെയില്‍വേ സ്റ്റേഷനിലെത്തിയ ടീം അംഗങ്ങളെയും ബൊക്കയും പൂവും നല്‍കി സ്വീകരിച്ചു. രാവിലെ 7.27 ന് കോഴിക്കോട് റെയില്‍വേ സ്റ്റേഷനില്‍ ഒഡീഷ്യ ടീമും എത്തി. ഇവരെയും ബൊക്കയും പൂവും നല്‍കി സ്വീകരിക്കുകയായിരുന്നു.
