കൊല്ലം : കൊട്ടാരക്കര സര്ക്കാര് ആശുപത്രിയില് ഹൗസ് സര്ജനെ കുത്തിക്കൊലപ്പെടുത്തിയ കേസില് പ്രതി സന്ദീപിനെ റിമാന്റ് ചെയ്തു. ഡോ. വന്ദന ദാസിനെ കുത്തി കൊലപ്പെടുത്തിയ കേസിലാണ് കൊട്ടരാക്കര മജിസ്ട്രേറ്റ് കോടതി പ്രതിയെ റിമാന്റ് ചെയ്തത്. സംഭവത്തില് പ്രതിഷേധിച്ച് ഡോക്ടര്മാരുടെ പണിമുടക്ക് നാളെയും തുടരുമെന്ന് ഐഎംഎ അറിയിച്ചു.
വന്ദനയുടെ കൊലപാതകത്തിനു പിന്നാലെ ഡോക്ടര്മാരുടെ സുരക്ഷിതത്വം ഉറപ്പുവരുത്താന് മുഖ്യമന്ത്രി ഇടപെടണമെന്നും ഡോക്ടര്മാരുടെ സുരക്ഷ ഉറപ്പാക്കുന്ന ചട്ടം ഓര്ഡിനന്സായി ഉടന് ഇറക്കണമെന്നും ഐഎംഎ ആവശ്യപ്പെട്ടു. പൊലീസിന്റെ സാന്നിധ്യത്തില് ഇത്തരമൊരു കൊലപാതകം നടന്നത് അതീവ ഗൗരവതരമെന്ന് കേരള ഗവ മെഡിക്കല് ഓഫീസേര്സ് അസോസിയേഷനും വിമര്ശിച്ചു.
കൊട്ടാരക്കര താലൂക്ക് ആശുപത്രിയില് ഇന്ന് പുലര്ച്ചെയാണ് സംഭവം നടന്നത്. പൊലീസ് വൈദ്യ പരിശോധനയ്ക്ക് എത്തിച്ച നെടുമ്പന യുപി സ്കൂള് അധ്യാപകന് കൂടിയായ ജി സന്ദീപ് ഹൗസ് സര്ജനായ കോട്ടയം മുട്ടുചിറ സ്വദേശിയായ ഡോ വന്ദന ദാസിനെ കുത്തിക്കൊലപ്പെടുത്തുകയായിരുന്നു.