മലപ്പുറം : രോഗം മറച്ച് വെച്ച് പോളിസിയെടുത്തുവെന്നാരോപിച്ച് ആനുകൂല്യം നിഷേധിച്ചതിന് ഉപഭോക്താവിന് ഇന്‍ഷൂറന്‍സ് തുകയും നഷ്ടപരിഹാരവും കോടതിച്ചെലവും നല്‍കാന്‍ ഉപഭോക്തൃ കമ്മീഷന്റെ ഉത്തരവ്. പെരിന്തല്‍മണ്ണ കൊളത്തൂര്‍ സ്വദേശി ഉമ്മര്‍ നല്‍കിയ പരാതിയിലാണ് ഇന്‍ഷൂറന്‍സ് തുകയായ 1272831 രൂപയും നഷ്ടപരിഹാരമായി ഒരു ലക്ഷം രൂപയും കോടതി ചെലവ് 20000 രൂപയും നല്‍കാന്‍ സ്റ്റാര്‍ ഹെല്‍ത്ത് ഇന്‍ഷൂറന്‍സ് കമ്പനിക്കെതിരെ കമ്മീഷന്‍ വിധിച്ചത്.
രോഗം മറച്ചുവച്ചാണ് ആരോഗ്യ ഇന്‍ഷൂറന്‍സ് പോളിസിയെടുത്തത് എന്നായിരുന്നു കമ്പനിയുടെ വാദം. പരാതിക്കാരന്‍ വൃക്ക സംബന്ധമായ അസുഖത്തിന് പെരിന്തല്‍മണ്ണ ഇ.എം.എസ് ആശുപത്രിയിലും തൃശൂരിലെ വെസ്റ്റ് ഫോര്‍ട്ട് ആശുപത്രിയിലും ചികിത്സ തേടിയിരുന്നു. വെസ്റ്റ് ഫോര്‍ട്ട് ആശുപത്രിയിലെ ചികില്‍സാരേഖയില്‍ രണ്ടു മാസമായി ചികില്‍സയുണ്ടായിരുന്നുവെന്ന് രേഖപ്പെടുത്തിയിരുന്നു. ഇതിൻ്റെ അടിസ്ഥാനത്തില്‍ ഇന്‍ഷൂറന്‍സ് പോളിസിയെടുക്കുമ്പോഴേ രോഗമുണ്ടായിരുന്നുവെന്നായിരുന്നു കമ്പനിയുടെ വാദം.
രോഗം മറച്ച് വെച്ചാണ് പോളിസി എടുത്തതെന്നും അതിനാല്‍ ആനുകൂല്യം നല്‍കാനാവില്ല എന്നും കമ്പനി അറിയിക്കുകയായിരുന്നു. ചികില്‍സാ കാലയളവ് കാണിച്ചതില്‍ പിഴവു പറ്റിയതാണെന്ന് കാണിച്ച് ഡോക്ടര്‍ നല്‍കിയ സര്‍ട്ടിഫിക്കറ്റ് ഹാജരാക്കിയെങ്കിലും അത് പരിഗണിക്കാന്‍ കമ്പനി തയ്യാറായില്ല. തുടര്‍ന്നാണ് ഉപഭോക്തൃ കമ്മീഷനില്‍ പരാതി നല്‍കിയത്.
രേഖകള്‍ പരിശോധിച്ച കമ്മീഷന്‍ ഇന്‍ഷൂറന്‍സ് കമ്പനിയുടെ നടപടി സേവനത്തിലുള്ള വീഴ്ചയാണെന്ന് കണ്ടെത്തുകയായിരുന്നു. രേഖയില്‍ പിഴവുവന്നത് ബന്ധപ്പെട്ട ഡോക്ടര്‍ തിരുത്തിയിട്ടും ഇന്‍ഷൂറന്‍സ് ആനുകൂല്യം നിഷേധിച്ചത് സേവനത്തിലുള്ള വീഴ്ചയാണെന്ന് കമ്മീഷന്‍ കണ്ടെത്തി. ചികില്‍സാ ചെലവായ 12,72,831 രൂപ ഒമ്പത് ശതമാനം പലിശയോടെ നല്‍കണമെന്നും കമ്മീഷന്‍ ഉത്തരവിട്ടു.
ഗുരുതരരോഗത്തിന് ചികില്‍സാ ചെലവ് നല്‍കുന്നതില്‍ വീഴ്ച വരുത്തിയതിലുണ്ടായ പ്രയാസങ്ങള്‍ പരിഗണിച്ച് ഒരു ലക്ഷം രൂപ നഷ്ടപരിഹാരവും 20,000 രൂപ കോടതി ചെലവും ഒരു മാസത്തിനകം നല്‍കണമെന്ന് കെ.മോഹന്‍ദാസ് പ്രസിഡന്റും, പ്രീതിശിവരാമന്‍, സി.വി. മുഹമ്മദ് ഇസ്മായില്‍ എന്നിവര്‍ അംഗങ്ങളുമായ ജില്ലാ ഉപഭോക്തൃ കമ്മീഷന്‍ ഉത്തരവില്‍ പറഞ്ഞു.