മികച്ച കായിക പ്രകടനത്തിനുള്ള കാലിക്കറ്റ് സര്‍വകലാശാലയുടെ ഓവറോള്‍ പുരസ്‌കാരം ഇരിങ്ങാലക്കുട ക്രൈസ്റ്റ് കോളേജിന്. 2020-21 വര്‍ഷങ്ങളിലെ കായിക മത്സരങ്ങളില്‍ പുരുഷ-വനിതാ-മിക്‌സഡ് വിഭാഗങ്ങളിലായി 337 പോയിന്റ് നേടിയ ക്രൈസ്റ്റ് കോളേജിന് എഴുപത്തയ്യായിരം രൂപ ക്യാഷ് അവാര്‍ഡും ട്രോഫിയും വൈസ് ചാന്‍സലര്‍ ഡോ. എം.കെ. ജയരാജ് സമ്മാനിച്ചു.
സെന്റ് തോമസ് കോളേജ് തൃശ്ശൂര്‍, സഹൃദയ കോളേജ് കൊടകര, വിമല കോളേജ് തൃശ്ശൂര്‍, ഫാറൂഖ് കോളേജ് എന്നിവയാണ് ഓവറോള്‍ വിഭാഗത്തില്‍ യഥാക്രമം രണ്ടു മുതല്‍ അഞ്ച് വരെ സ്ഥാനക്കാര്‍.
വനിതാ വിഭാഗത്തില്‍ ക്രൈസ്റ്റ് ഇരിങ്ങാലക്കുടയും പുരുഷ വിഭാഗത്തില്‍ സെന്റ് തോമസ് കോളേജ് തൃശ്ശൂരുമാണ് ജേതാക്കള്‍.
വിമല കോളേജ് തൃശ്ശൂര്‍, മേഴ്‌സി കോളേജ് പാലക്കാട്, സെന്റ് മേരീസ് തൃശ്ശൂര്‍, സെന്റ് തോമസ് തൃശ്ശൂര്‍ എന്നിവരാണ് വനിതാ വിഭാഗത്തിലെ ചാമ്പ്യന്മാര്‍. പുരുഷ വിഭാഗത്തില്‍ ക്രൈസ്റ്റ് ഇരിങ്ങാലക്കുട, സഹൃദയ കൊടകര, ഫാറൂഖ് കോളേജ്, നൈപുണ്യ കൊരട്ടി, എം.ഇ.എസ്. കല്ലടി എന്നിവരാണ് ജേതാക്കള്‍. പുരസ്‌കാര വിതരണം വൈസ് ചാന്‍സലര്‍ ഡോ. എം.കെ. ജയരാജ് ഉദ്ഘാടനം ചെയ്തു. രജിസ്ട്രാര്‍ ഡോ. ഇ.കെ. സതീഷ് അധ്യക്ഷനായി. സ്‌പോര്‍ട്‌സ് കേരള ഫൗണ്ടേഷന്‍ ഡയറക്ടര്‍മാരായ വി.പി. അനില്‍, ആഷിഖ് കൈനികര എന്നിവരെ ചടങ്ങില്‍ ആദരിച്ചു.
സിന്‍ഡിക്കേറ്റംഗങ്ങളായ കെ.കെ. ഹനീഫ, അഡ്വ. ടോം കെ. തോമസ്, ഡോ. എം. മനോഹരന്‍, ഡോ. കെ.പി. വിനോദ് കുമാര്‍, ഡോ. ജി. റിജുലാല്‍, കായികാധ്യാക സംഘടനാ സെക്രട്ടറി ഡോ. ഷിനു, സര്‍വകലാശാലാ കായികവിഭാഗം ഡയറക്ടര്‍ ഡോ. വി.പി. സക്കീര്‍ ഹുസൈന്‍, ഡെപ്യൂട്ടി ഡയറക്ടര്‍ ഡോ. എം.ആര്‍. ദിനു, അസി. ഡയറക്ടര്‍ ഡോ. കെ. ബിനോയ് തുടങ്ങിയവര്‍ പങ്കെടുത്തു.