ദില്ലി: രാമനവമി ആഘോഷങ്ങള്ക്ക് പിന്നാലെ ജാര്ഖണ്ഡിലെ ജംഷദ്പൂരില് സംഘര്ഷങ്ങളുടെ തുടര്ച്ചയായി വീണ്ടും കല്ലേറും ആക്രമണങ്ങളും ഉണ്ടായതോടെ നിരോധനാജ്ഞ പ്രഖ്യാപിച്ചു. മൊബൈല് ഇന്റര്നെറ്റും താത്കാലികമായി നിരോധിച്ചിട്ടുണ്ട്. നിലവില് സ്ഥിതിഗതികള് നിയന്ത്രണവിധേയമാണെന്ന് സിറ്റി പൊലീസ് മേധാവി പ്രഭാത് കുമാര് വാര്ത്താ ഏജന്സിയോട് പറഞ്ഞു.
കഴിഞ്ഞദിവസം രാമനവമി പതാകയെ ചൊല്ലിയാണ് ഇരുവിഭാഗങ്ങള് തമ്മില് സംഘര്ഷം ഉടലെടുത്തത്. സംഘടിച്ചെത്തിയ ആള്ക്കൂട്ടം ശാസ്ത്രിനഗര് മേഖലയില് രണ്ട് കടകള്ക്കും ഒരു ഓട്ടോറിക്ഷയ്ക്കും തീയിട്ടു. അക്രമികളെ പിരിച്ചുവിടാന് പൊലീസ് കണ്ണൂര്വാതകം പ്രയോഗിച്ചു. സമാധാനന്തരീക്ഷം തകര്ക്കാന് വേണ്ടി സാമൂഹ്യവിരുദ്ധര് സോഷ്യല്മീഡിയിലൂടെ നടത്തുന്ന പ്രചരണങ്ങള്ക്കെതിരെയും പൊലീസ് മുന്നറിയിപ്പ് നല്കി. സംഘര്ഷസാധ്യത കണക്കിലെടുത്ത് പ്രദേശത്ത് റാപ്പിഡ് ആക്ഷന് ഫോഴ്സിനെ വിന്യാസിച്ചിട്ടുണ്ട്