മലപുറം : ജില്ലയില് റിപ്പബ്ലിക് ദിനം വിപുലമായി ആഘോഷിക്കാന് ജില്ലാ കളക്ടര് വി.ആര്.വിനോദിന്റെ അധ്യക്ഷതയില് ചേര്ന്ന യോഗത്തില് തീരുമാനം. മലപ്പുറം എം.എസ്.പി പരേഡ് ഗ്രൗണ്ടില് ജനുവരി 26ന് നടക്കുന്ന ജില്ലാതല റിപ്പബ്ലിക് ദിനാഘോഷ ചടങ്ങില് കായിക – ന്യൂനപക്ഷ ക്ഷേമവകുപ്പ് മന്ത്രി വി.അബ്ദുറഹ്മാന് മുഖ്യാതിഥിയാകും. രാവിലെ 8.35 ന് സിവില് സ്റ്റേഷനിലെ യുദ്ധസ്മാരകത്തില് പുഷ്പാര്ച്ചന നടത്തുന്ന മന്ത്രി 9 മണിക്ക് എം.എസ്.പി ഗ്രൗണ്ടില് ദേശീയപതാക നിവര്ത്തും. തുടര്ന്ന് പരേഡ് പരിശോധിക്കുന്ന മന്ത്രി മാര്ച്ച് പാസ്റ്റിന് സല്യൂട്ട് സ്വീകരിക്കും. 9.18 ന് പരേഡിനെ അഭിസംബോധന ചെയ്തു സംസാരിക്കും. പരേഡിന് എം.എസ്.പി.അസിസ്റ്റന്റ് കമാണ്ടന്റ് കെ.വി.രാജേഷ് നേതൃത്വം നല്കും. സായുധ പൊലീസ് ഇന്സ്പെക്ടര് ഇ.പി. ഷീബു സെക്കന്ഡ് ഇന് കമാന്ഡറാകും. എം.എസ്.പി, പൊലീസ്, സായുധ റിസര്വ് പോലീസ്, എക്സൈസ്, വനിതാ പോലീസ്, വനം വകുപ്പ്, ഫയര്ഫോഴ്സ്, എന്.സി.സി., എസ്.പി.സി., സ്കൗട്സ് ആന്ഡ് ഗൈഡ്സ്, ജൂനിയര് റെഡ്ക്രോസ് തുടങ്ങി 37 പ്ലാറ്റൂണുകള് പരേഡില് അണിനിരക്കും.
മലപ്പുറം നഗരസഭാ അതിര്ത്തിയിലെ സ്കൂളുകളിലെ വിദ്യാര്ഥികളെ പങ്കെടുപ്പിച്ചു കൊണ്ട് രാവിലെ ഏഴിന് പ്രഭാതഭേരി നടക്കും. സിവില് സ്റ്റേഷന് പരിസരത്തു നിന്ന് ആരംഭിച്ച് പെരിന്തല്മണ്ണ റോഡില് എം.എസ്.പി. പരേഡ് ഗ്രൗണ്ടില് അവസാനിക്കും. ബാന്റ് സെറ്റുകളുടെയും സ്കൗട്ട്സ് ആന്റ് ഗൈഡ്സ്, ജൂനിയര് റെഡ്ക്രോസ് മാര്ച്ച് പാസ്റ്റിന്റെയും മറ്റും അകമ്പടിയോടെ നടക്കുന്ന പ്രഭാതഭേരിയില് മികച്ച പ്രകടനം നടത്തുന്ന ടീമിനും പരേഡില് മികച്ച പ്രകടനം നടത്തുന്ന വിഭാഗങ്ങള്ക്കും റോളിങ് ട്രോഫികള് സമ്മാനിക്കും. പരേഡില് പങ്കെടുക്കുന്ന വിദ്യാര്ഥികള്ക്ക് ജനുവരി 21, 22, 23 തിയതികളിലായി എം.എസ്.പി പരേഡ് ഗ്രൗണ്ടില് പരിശീലനം നല്കും. 21, 22 തിയതികളില് ഉച്ചയ്ക്ക് 3.30നും 23ന് രാവിലെ എട്ടിനുമാണ് പരിശീലനം ആരംഭിക്കുക. റിപ്പബ്ലിക് ദിനാഘോഷം, പരേഡ് എന്നിവയുമായി ബന്ധപ്പെട്ട ഒരുക്കങ്ങള്ക്ക് വിവിധ വകുപ്പുകളിലെ ഉദ്യോഗസ്ഥരെ ജില്ലാ കളക്ടര് ചുമതലപ്പെടുത്തി. മലപ്പുറം നഗരസഭയിലെ പൊതുസ്ഥലങ്ങള് വൃത്തിയാക്കാന് മുന്സിപ്പല് അധികൃതര്ക്ക് കളക്ടര് നിര്ദേശം നല്കി. ആഘോഷദിവസം വ്യാപാരസ്ഥാപനങ്ങള് അലങ്കരിക്കും. പൊതുജനങ്ങള്ക്ക് റിപ്പബ്ലിക് ദിനാഘോഷ പരിപാടികള് വീക്ഷിക്കാന് ക്രമീകരണങ്ങള് ഒരുക്കിയിട്ടുണ്ട്.
കളക്ടറേറ്റ് കോണ്ഫ്രന്സ് ഹാളില് ചേര്ന്ന യോഗത്തില് എ.ഡി.എം. കെ. ദേവകി, ദുരന്തനിവാരണ വിഭാഗം ഡെപ്യൂട്ടി കളക്ടര് സ്വാതി ചന്ദ്രമോഹന്, വിവിധ ഉദ്യോഗസ്ഥര് തുടങ്ങിയവര് പങ്കെടുത്തു.