യാത്രക്കാരുടെ ലഗേജ് പൊട്ടിച്ച നിലയിൽ;പണവും വസ്‌തുക്കളും കവർന്നു

കൊണ്ടട്ടി : ദുബായിൽനിന്നു കരിപ്പൂർ വിമാനത്താവളത്തിൽ എത്തിയ 2 യാത്രക്കാരുടെ ലഗേജ് പൊട്ടിച്ചു സാധനങ്ങളും പണവും കവർന്നതായി പരാതി. പാലക്കാട് തൃത്താല പടിഞ്ഞാറങ്ങാടി സ്വദേശികളായ ഇബ്രാഹിം ബാദുഷ, ബന്ധു മുഹമ്മദ് ബാസിൽ എന്നിവരാണ് ഇതുസംബന്ധിച്ചു പരാതിപ്പെട്ടത്.
ഇക്കഴിഞ്ഞ 19 നായിരുന്നു സംഭവം. സ്പൈസ് ജെറ്റ് വിമാനത്തിൽ ദുബായിൽനിന്നു കരിപ്പൂരിലെത്തിയതായിരുന്നു ഇവർ.
ലഗേജ് പൊട്ടിച്ച് 26,500 രൂപ കവർന്നതായി ഇബ്രാഹിം ബാദുഷ പരാതി നൽകി. വിമാനക്കമ്പനി, വ്യോമയാന മന്ത്രി, പൊലീസ്, ദുബായ് സിവിൽ ഏവിയേഷൻ അതോറിറ്റി തുടങ്ങിയവർക്കു പരാതി നൽകിയതായി ഇബ്രാഹിം ബാദുഷ പറഞ്ഞു.
പെട്ടിയുടെ പൂട്ട് തകർത്ത നിലയിലാണ് കൺവെയർ ബെൽറ്റിൽ ലഗേജ് കണ്ടത്. തുടർന്ന് നടത്തിയ പരിശോധനയിലാണു പണം നഷ്ടമായതായി കണ്ടത്.

കൺവെയർ ബെൽറ്റിലൂടെ എത്തിയ ട്രോളി ബാഗിൻ്റെ ലോക്ക് പൊട്ടിച്ച നിലയിലായിരുന്നുവെന്നു മുഹമ്മദ് ബാസിലും പറഞ്ഞു. ഏകദേശം 23,000 രൂപ വിലവരുന്ന എയർപോഡ് ആണ് മുഹമ്മദ് ബാസിലിനു നഷ്ട‌മായത്‌. നിയമ നടപടിയുമായി മുന്നോട്ടുപോകുമന്ന് ഇവർ പറഞ്ഞു.