ജില്ലയുടെ അഭിമാനമായി ഒളകര ജി.എൽ.പി സ്കൂളിന് സംസ്ഥാന പുരസ്കാരം
2021-22 അധ്യയന വർഷത്തെ സംസ്ഥാന തല സ്കൂൾ വിക്കി പുരസ്കാരം കേരള സർക്കാർ പ്രഖ്യാപിച്ചപ്പോൾ മലപ്പുറം ജില്ലക്ക് അഭിമാന നേട്ടം. വേങ്ങര ഉപജില്ലയിലെ പെരുവള്ളൂർ ഒളകര ജി.എൽ.പി.സ്കൂൾ രണ്ടാം സ്ഥാനത്തിന് അർഹരായി.
സംസ്ഥാനത്തെ മുഴുവൻ സ്കൂളുകളെയും ബന്ധിപ്പിച്ച്, സഹവർത്തിത പഠനാനുഭവം പ്രദാനം ചെയ്യുന്നതിനും മലയാളം കമ്പ്യൂട്ടിംഗ് വ്യാപകമാക്കുന്നതിനും കൈറ്റ് ( ഐ.ടി. @ സ്കൂൾ ) ആരംഭിച്ച 15000 – ത്തോളം സ്കൂളുകൾ ഉൾപ്പെട്ട പദ്ധതിയാണ് ‘ സ്കൂൾ വിക്കി’.
സ്കൂൾ വിക്കി’യുടെ മുൻ കോ – ഓർഡിനേറ്ററായിരുന്ന കെ.ശബരീഷിന്റെ പേരിലാണ് സ്കൂൾ വിക്കി സംസ്ഥാന അവാർഡ് ഏർപ്പെടുത്തിയിരിക്കുന്നത്.
കോവിഡ് മഹാമാരിക്കു ശേഷം 2021 നവംബർ 1 ന് തിരികെ സ്കൂളിലേക്ക് സ്കൂൾ പ്രവേശന ഉദ്ഘാടന വേദിയിൽ വിദ്യാഭ്യാസ മന്ത്രി വി.ശിവൻകുട്ടി പ്രഖ്യാപിച്ചതായിരുന്നു ഇത്തവണത്തെ ശബരീഷ് സ്മാരക സ്കൂൾ വിക്കി പുരസ്കാരം.
സ്കൂൾ ചരിത്രം, മാനേജ്മെന്റ്, പ്രധാനാധ്യാപകർ, സൗകര്യങ്ങൾ, ലഭ്യമായ അംഗീകാരങ്ങൾ, സ്കൂളിലെ ക്ലബ്ബുകൾ പ്രവർത്തനങ്ങൾ, പ്രശസ്തരായ പൂർവ്വ വിദ്യാർത്ഥികൾ, എന്നിവയെല്ലാം കൃത്യമായി വളരെ ഭംഗിയായി ക്രമീകരിക്കുന്ന വിദ്യാലയങ്ങളിൽ നിന്ന് ഉപജില്ല, ജില്ല, ക്ലസ്റ്റർ, തുടങ്ങിയ ഘട്ടങ്ങളെല്ലാം കഴിഞ്ഞ് 85 സ്കൂളുകൾ മാത്രമായി ചുരുങ്ങിയ സംസ്ഥാന തല മത്സരത്തിൽ രണ്ടാം സ്ഥാനം നേടിയാണ് ഒളകര ജി.എൽ.പി സ്കൂൾ ജില്ലയുടെ അഭിമാനമായി മാറിയത്. ഒരു ലക്ഷം രൂപയാണ് രണ്ടാം സ്ഥാനം നേടിയ സ്കൂളിനെ തേടിയെത്തുന്നത്. പ്രധാനാധ്യാപകൻ കെ.ശശികുമാർ, പി.ടി.എ പ്രസിഡന്റ് പി.പി അബ്ദു സമദ്, സോമരാജ് പാലക്കൽ സ്കൂൾ വിക്കി ചുമതലയുള്ള അധ്യാപകൻ ജംഷീദ് വി എന്നിവർ നേതൃത്വം നൽകി. വേങ്ങര ഉപജില്ലയിൽ തുടർച്ചയായി രണ്ടു വർഷവും മുൻ വർഷം മലപ്പുറം ജില്ലയിലും മികച്ച പി.ടി. എ അവാർഡിന് സ്കൂൾ അർഹരായിരുന്നു. പാഠ്യ-പാഠ്യേതര പ്രവർത്തനങ്ങളിലൂടെ മികച്ച കലാലയമായി മാറുമ്പോഴും രണ്ടു ഏക്കറിനടുത്ത് വിശാലമായ സ്ഥല സൗകര്യങ്ങൾ ഉള്ള 100 വർഷം പഴക്കമുള്ള ഒളകര ജി. എൽ പി സ്കൂൾ എന്ത് കൊണ്ട് എൽ.പി. വിദ്യാലയമായി തന്നെ തുടരുന്നു എന്ന് രക്ഷിതാക്കൾക്കിടയിൽ ചോദ്യമായി ഇന്നും നിലനിൽക്കുന്നു.