പാലക്കാട്: സിനിമയിൽ മാത്രമാണ് കട്ടിള കള്ളന്മാരെ നമ്മൾ കണ്ടിട്ടുള്ളതെങ്കിൽ ഇപ്പോൾ പാലക്കാട് ചെർപ്പുളശ്ശേരി ഇത്തരത്തിൽ ഒരു കള്ളൻ ഉണ്ട്. വ്യത്യസ്തമായ ഇരുമ്പ് ഗേറ്റ് മോഷണം നടക്കുന്നത് ചെർപ്ലശ്ശേരി മഠത്തിപ്പറമ്പിലാണ്. കഴിഞ്ഞ ഒരാഴ്ചക്കിടെ ഈ പ്രദേശത്തെ 10 വീടുകളിൽ നിന്നാണ് ഇരുമ്പു ഗേറ്റ് മോഷണം പോയിരിക്കുന്നത്.
ആദ്യം വീടുകൾ ഇല്ലാത്ത പറമ്പുകളുടെ ഗേറ്റുകൾ ആയിരുന്നു കള്ളൻ മോഷ്ടിച്ചിരുന്നത്. അതിനാൽ തന്നെ പരാതി ലഭിക്കുന്നത് കുറവായിരുന്നു. എന്നാൽ ഇപ്പോൾ കള്ളൻ രീതി മാറ്റി ആളുകളുള്ള വീടുകളുടെ ഗേറ്റുകൾ മോഷ്ടിക്കാൻ തുടങ്ങി.രാത്രി ഭദ്രമായി പൂട്ടി കിടന്ന ഗേറ്റ് പിറ്റേദിവസം നോക്കുമ്പോൾ പൊടിപോലും ഉണ്ടാകില്ല.
സംഭവത്തിൽ നിരവധി ആളുകളാണ് പോലീസിൽ പരാതിപ്പെട്ടു കൊണ്ടിരിക്കുന്നത്. പ്രദേശത്തെ സ്ഥിരം കള്ളന്മാരെ കേന്ദ്രീകരിച്ച് പൊലീസ് അന്വേഷണം ആരംഭിച്ചിട്ടുണ്ട്.