തിരുവനന്തപുരം : പി.വി.അൻവർ എം എൽ എ സ്ഥാനം രാജിവെച്ചു.
രാവിലെ സ്പീക്കറെ കണ്ട് അൻവർ രാജിക്കത്ത് കൈമാറുകയായിരുന്നു. നിയമസഭാ സമ്മേളനം നടക്കാനിരിക്കെയാണ് അൻവർ രാജി സമർപ്പിച്ചിരിക്കുന്നത്. തൃണമൂൽ കോണ്ഗ്രെസിൽ ചേർന്നതിനാൽ,
എംഎല്‍എ സ്ഥാനത്തു നിന്നുള്ള അയോഗ്യതാ നീക്കം മുൻകൂട്ടി കണ്ടാണ് അൻവറിൻ്റെ രാജി. സ്വത ന്ത്രനായി വിജയിച്ചയാൾ മറ്റൊരു പാർട്ടിയിൽ ചേർന്നാൽ അയോഗ്യത ഉണ്ടാകും. അൻവർ തൃണമൂൽ കോണ്ഗ്രെസിൽ ചേർന്നതായി
ഔദ്യോഗികമായി പറയാതെ സഹകരിക്കാൻ തീരുമാനിച്ചു എന്നു മാത്രമായിരുന്നു പറഞ്ഞിരുന്നത്. എന്നാൽ തൃണമൂൽ കോൺഗ്രസ് അവാരുടെ സോഷ്യൽ മീഡിയ പേജിൽ അൻവർ പാർട്ടിയിൽ ചേർന്ന കാര്യം പോസ്റ്റ് ചെയ്തിരുന്നു.
അൻവർ സ്ഥാനം രാജി വെച്ചതോടെ നിലമ്ബൂർ നിയമസഭാ മണ്ഡലത്തില്‍ ഉപതിരഞ്ഞെടുപ്പ് അനിവാര്യമായിരിക്കുകയാണ്. തദ്ദേശ തിരഞ്ഞെടുപ്പിന് മുന്നോടിയായി ഇതോടെ കേരളത്തില്‍ മറ്റൊരു തിരഞ്ഞെടുപ്പ് പേരാട്ടത്തിന് കൂടി അരങ്ങൊരുങ്ങുകയാണ്. എല്ലാ കാര്യങ്ങളും വാര്‍ത്താസമ്മേളനത്തില്‍ പറയാമെന്നാണ് രാജികത്ത് കൈമാറിയ കാര്യം സ്ഥിരീകരിച്ചുകാണ്ട് പി വി അന്‍വര്‍ പറഞ്ഞത്.
നേരത്തെ തൃണമൂല്‍ കോണ്‍ഗ്രസ് നേതാവ് മമത ബാനർജിയുമായി അൻവർ കൂടിക്കാഴ്ച നടത്തിയിരുന്നു. ഇതിന് പിന്നാലെയാണ് രാജിവെയ്ക്കാൻ അൻവർ തീരുമാനിച്ചത്. തൃണമൂല്‍ കോണ്‍ഗ്രസിൻ്റെ ഒഴിവ് വരുന്ന രാജ്യസഭാ സീറ്റ് അൻവറിന് നല്‍കിയേക്കുമെന്നും സൂചനകളുണ്ട്. മമതാ ബാനർജിയുടെ നിർദ്ദേശപ്രകാരമാണ് അൻവർ എംഎല്‍എ സ്ഥാനം രാജിവെയ്ക്കുന്നതെന്നാണ് സൂചന.
നിലവില്‍ സിപിഐഎം സ്വതന്ത്രനായാണ് അൻവർ നിലമ്ബൂരില്‍ നിന്നും വിജയിച്ചത്. തുടർച്ചയായി രണ്ട് തവണ നിലമ്ബൂരില്‍ നിന്നും വിജയിച്ച അൻവർ ആര്യാടൻ മുഹമ്മദിൻ്റെ കുത്തക മണ്ഡലമായിരുന്ന നിലമ്ബൂരിനെ ഇടതുപക്ഷത്തിന് അനുകൂലമാക്കുകയായിരുന്നു. രാജിവെച്ചാല്‍ അൻവർ വീണ്ടും നിലമ്ബൂരില്‍ നിന്നും മത്സരിക്കുമോ, തൃണമൂല്‍ സ്ഥാനാർത്ഥിയായി അൻവർ മത്സരിച്ചാല്‍ യുഡിഎഫ് പിന്തുണയ്ക്കുമോ തുടങ്ങിയ ചോദ്യങ്ങള്‍ ഇതിനകം രാഷ്ട്രീയ കേന്ദ്രങ്ങളില്‍ ഉയർന്നു കഴിഞ്ഞു. മലപ്പുറം ജില്ലയില്‍ കോണ്‍ഗ്രസിൻ്റെ പരമ്ബരാഗത ശക്തികേന്ദ്രമായ നിലമ്ബൂർ തൃണമൂല്‍ കോണ്‍ഗ്രസിന് വിട്ടുനല്‍കാനുള്ള നീക്കം ജില്ലയിലെ കോണ്‍ഗ്രസ് നേതാക്കള്‍ അനുകൂലിക്കാൻ സാധ്യതയില്ല. എന്തുതന്നെയായാലും ആകാംക്ഷ നിറഞ്ഞ രാഷ്ട്രീയ കരുനീക്കങ്ങള്‍ക്കാണ് അൻവർ വീണ്ടും ഒരുങ്ങുന്നത്.
കഴിഞ്ഞ ദിവസമാണ് അൻവർ മമതാ ബാനർജിയുടെ തൃണമൂല്‍ കോണ്‍ഗ്രസുമായി കൈകോർത്തത്. പാർട്ടി അംഗത്വം സ്വീകരിച്ചിട്ടില്ല. മറിച്ച്‌ സംസ്ഥാന കോർഡിനേറ്ററായി പ്രവർത്തിക്കുമെന്നാണ് അറിയിച്ചത്. നിലമ്ബൂർ ഫോറസ്റ്റ് ഓഫീസ് അക്രമിച്ചതുമായി ബന്ധപ്പെട്ട കേസില്‍ അറസ്റ്റിലായതിന് പിന്നാലെ അൻവറിന്റെ യുഡിഎഫ് പ്രവേശന അഭ്യൂഹം ശക്തമായിരുന്നു. അതിനിടെയാണ് തൃണമൂല്‍ കോണ്‍ഗ്രസുമായുള്ള കെെകോർക്കല്‍.