സമൂഹ മാധ്യമങ്ങളിലൂടെ അപമാനിച്ചെന്ന്; ഗായകൻ ഹഖ് തിരൂരങ്ങാടി എംഡിഎഫ് പ്രസിഡന്റ് കെ.എം.ബഷീറിനെതിരെ പരാതി നൽകി

തിരൂരങ്ങാടി: സാമൂഹ്യ മാധ്യമങ്ങളിലൂടെ വ്യക്തിഹത്യ നടത്തിയതായി പരാതി.
മുൻ പ്രവാസി ബിസിനസ്സുകാരനും ഗായകനുമായ തിരൂരങ്ങാടി സ്വദേശി കെ.ടി അബ്ദുൽ ഹഖ് ആണ് മലബാർ ഡെവലപ്‌മെന്റ് ഫോറം പ്രസിഡന്റും കോഴിക്കോട് കല്ലായി സ്വദേശിയുമായ കെ.എം ബഷീറിനെതിരെ രംഗത്തുവന്നത്. ദുബായിൽ നിന്ന് കേരള സന്ദർശനത്തിനെത്തിയ അബ്ദുൾ ഹഖിന്റെ സുഹൃത്തായ പൊലിസ് ഉദ്യോഗസ്ഥന്റെ ബാഗേജ് കോഴിക്കോട് വിമാനതാവളത്തിൽ നിന്നും കീറിയ നിലയിൽ കണ്ടെത്തിയിരുന്നു. സംഭവത്തിൽ കരിപ്പൂർ പൊലിസിലും, വിമാനത്താവള അധികൃതർക്കും പരാതി നൽകിയെങ്കിലും തുടർ നടപടികൾ ഉണ്ടായില്ലത്രെ.അധികൃതരുടെ നിരുത്തരവാദ സമീപനത്തെ വിമർശിച്ചുകൊണ്ട് അബ്ദുൽ ഹഖ് ഫെയ്‌സ് ബുക്കിൽ വീഡിയോ പോസ്റ്റിയിരുന്നു.
വർഷങ്ങൾക്ക് മുമ്പ് ചെയ്ത വീഡിയോയിലെ ചില ഭാഗങ്ങൾ അടർത്തിയെടുത്ത് കെ.എം ബഷീർ,തന്നെ അപമാനിക്കുന്ന രീതിയിലുള്ള പദപ്രയോഗങ്ങളും വാചകങ്ങളും ഉപയോഗിച്ച് തന്റെ ഫേസ്ബുക്ക് പേജിലൂടെ പോസ്റ്റ് ചെയ്യുകയായിരുന്നു എന്നാണ് അബ്ദുൽ ഹഖിന്റെ പരാതി.
സമൂഹ മധ്യത്തിൽ അപകീർത്തിപ്പെടുത്തിയതിന് 50 ലക്ഷം രൂപ നഷ്ടപരിഹാരം ആവശ്യപ്പെട്ട് സുപ്രീം കോടതി അഭിഭാഷകൻ ഷിയാസ് കുഞ്ഞിബാവ മുഖേന അബ്ദുൽഹഖ് കെ.എം ബഷീറിനെതിരെ വക്കീൽ നോട്ടീസ് അയച്ചിട്ടുണ്ട്.