വേങ്ങര : ഹരിത കേരളം മിഷന്റെ ആഭിമുഖ്യത്തില്‍ തദ്ദേശ സ്വയംഭരണ സ്ഥാപനങ്ങളുടെ നേതൃത്വത്തില്‍ വിവിധ വകുപ്പുകളുടെ ഏകീകരണത്തോടെയും ജനകീയ പങ്കാളിത്തത്തോടെയും ഒരുകോടി തൈകള്‍ നട്ടു പിടിപ്പിക്കുന്നതിന് ലക്ഷ്യമിട്ട് കേരളമൊട്ടാകെ നടപ്പിലാക്കുന്ന ജനകീയ വൃക്ഷവത്കരണ ക്യാമ്പയിന്‍ വേങ്ങര ബ്ലോക്ക് പഞ്ചായത്ത്തല ഉദ്ഘാടനം നടന്നു. ജി. എല്‍. പി, ഊരകം കിഴ്മുറി, കുറ്റാളൂര്‍ സ്‌കൂളിലെ അഞ്ചാം ക്ലാസ് വിദ്യാര്‍ത്ഥിനിയായ അഫ്ലഹക്ക് ഫലവൃക്ഷതൈ സമ്മാനിച്ചുകൊണ്ട് ബ്ലോക്ക് പഞ്ചായത്ത് പ്രസിഡണ്ട് മണ്ണില്‍ ബെന്‍സീറ ടീച്ചര്‍ ഉദ്ഘാടനം നിര്‍വഹിച്ചു.
ജി.എല്‍.പി.എസ് ഊരകം കിഴ്മുറി ഹെഡ് മാസ്റ്റര്‍ സുലൈമാന്‍ സ്വാഗതം പറഞ്ഞ ചടങ്ങില്‍ ബ്ലോക്ക് പഞ്ചായത്ത് ഡിവിഷന്‍ മെമ്പര്‍ രാധാ രമേശ് അദ്ധ്യക്ഷത വഹിച്ചു. ഹരിത കേരളം മിഷന്‍ റിസോഴ്‌സ് പേഴ്‌സന്‍ ശ്രീ ജോഷ്വ ജോണ്‍ പദ്ധതി വിശദീകരണം നടത്തി, വാര്‍ഡ് മെമ്പര്‍ പി.പി സൈദലവി, പിടിഎ പ്രസിഡന്റ് ഹാരിസ്, വേറേങ്ങല്‍ അഷ്‌റഫ് എന്നിവര്‍ ആശംസകളും അറിയിച്ചു.
സ്‌കൂളിലെ നൂറോളം വരുന്ന വിദ്യാര്‍ത്ഥികള്‍ ചേര്‍ന്ന് ചങ്ങാതിക്ക് ഒരു തൈ പദ്ധതിയും നടപ്പിലാക്കി. ഒരു തൈ നടാം ജനകീയ വൃക്ഷാവല്‍ക്കരണ ക്യാമ്പയിന്റെ ലോഗോ പ്രകാശനവും ഇതോടൊപ്പം നടന്നു. ജനകീയ വൃക്ഷവത്ക്കരണത്തിന്റെ ഭാഗമായി ബ്ലോക്ക് പരിധിയിലുള്ള പഞ്ചായത്തുകളിലും ഘടകസ്ഥാപനങ്ങളിലും സ്‌കൂളുകളിലും അങ്കണവാടികളിലും ക്യാമ്പയിനിന്റെ ഭാഗമായി വിവിധ വൃക്ഷവത്കരണ പരിപാടികള്‍ വിപുലമായി നടന്നുകൊണ്ടിരിക്കുന്നു.