കോട്ടയം മെഡിക്കല് കോളേജ് ആശുപത്രിയില് കെട്ടിടം തകര്ന്നു വീണ് മരിച്ച തലയോലപ്പറമ്പ് സ്വദേശി ബിന്ദുവിന്റെ പ്രാഥമിക പോസ്റ്റ്മോര്ട്ട് റിപ്പോര്ട്ട് പുറത്ത്. തലക്കേറ്റ ഗുരുതര പരിക്കും ആന്തരിക രക്തസ്രാവവുമാണ് ബിന്ദുവിന്റെ മരണകാരണമെന്ന് റിപ്പോര്ട്ടില് പറയുന്നു. ഭാരമുള്ള വസ്തുക്കള് പതിച്ചാണ് ആന്തരികാവയവങ്ങള്ക്കു ക്ഷതമേറ്റതെന്നും റിപ്പോര്ട്ടില് പറയുന്നു.
കോണ്ക്രീറ്റ് തൂണുകള് വീണ് ബിന്ദുവിന്റെ തലയോട്ടി തകര്ന്നിരുന്നതായാണ് ഇന്ക്വിസ്റ്റ് റിപ്പോര്ട്ടില് പറയുന്നത്. ബിന്ദുവിന്റെ മുഖത്തും സാരമായ പരുക്കേറ്റിരുന്നു. തലയുടെ മുക്കാല് ശതമാനവും തകര്ന്നിരുന്നുവെന്നും റിപ്പോര്ട്ടില് സൂചിപ്പിക്കുന്നുണ്ട്. വാരിയെല്ലുകള് പൂര്ണ്ണമായും ഒടിഞ്ഞുവെന്നും റിപ്പോര്ട്ടില് പറയുന്നു. ബിന്ദുവിന്റെ ശ്വാസകോശം, കരള്, ഹൃദയം ഉള്പ്പെടെയുള്ള ആന്തരീകാവയവങ്ങള്ക്ക് ഗുരുതരമായി ക്ഷതമേറ്റിരുന്നു.
രണ്ടര മണിക്കൂര് നേരമാണ് ബിന്ദു തകര്ന്നുവീണ കെട്ടിടത്തിനിടയില് കുടുങ്ങിക്കിടന്നത്. ഇന്നലെ രാവിലെയാണ് മെഡിക്കല് കോളേജ് ആശുപത്രിയിലെ പതിനാലാം വാര്ഡ് കെട്ടിടം തകര്ന്നു വീണ് മകള്ക്ക് കൂട്ടിരിപ്പിനായി എത്തിയ ബിന്ദു മരണപ്പെട്ടത്.