കോഴിക്കോട്: ഹൈ ലൈറ്റ് മാളിലെ സൂപ്പർ മാർക്കറ്റിൽ നിന്ന് എട്ടായിരം രൂപയോളം വിലവരുന്ന കോസ്മെറ്റിക് ഉൽപ്പന്നങ്ങൾ മോഷ്ടിച്ച കേസിൽ മലപ്പുറം സ്വദേശികളായ രണ്ട് പേർ അറസ്റ്റിൽ. പെരിന്തൽമണ്ണ പുളിക്കത്തൊടി മുഹമ്മദ് ഷമീൽ (20), തോട്ടേക്കാട് ആലിക്കപ്പറമ്പിൽ സബിത (19) എന്നിവരെയാണ് പന്തീരാങ്കാവ് പോലീസ് പിടികൂടിയത്. ഇരുവരും ഡിജിറ്റൽ മാർക്കറ്റിങ് വിദ്യാർത്ഥികളാണ്.
ഒക്ടോബർ 18-ന് വൈകുന്നേരമാണ് മാളിലെ സൂപ്പർ മാർക്കറ്റിൽ നിന്ന് ഉൽപ്പന്നങ്ങൾ മോഷ്ടിച്ചത്. ഹൈലൈറ്റ് മാളിലെ സൂപ്പർ മാർക്കറ്റിൽ ഹെൽത്ത് ആൻഡ് ബ്യൂട്ടി വിഭാഗത്തിൽ വിൽപനക്ക് വെച്ചിരുന്ന 8000 രൂപ വില വരുന്ന കോസ്മെറ്റിക് ഉൽപ്പന്നങ്ങൾ മോഷ്ടികയായിരുന്നു . ജീവനക്കാരൻ സുജിത് കുമാറിന്റെ പരാതിയിൽ പോലീസ് കേസെടുത്ത് അന്വേഷണം ആരംഭിച്ചു.
സ്ഥലത്തെയും സമീപ പ്രദേശങ്ങളിലെയും സി.സി.ടി.വി ദൃശ്യങ്ങൾ പരിശോധിച്ച പോലീസ് പ്രതികളെ മെഡിക്കൽ കോളേജ് പരിസരത്തുനിന്ന് കസ്റ്റഡിയിലെടുക്കുകയായിരുന്നു.
പ്രതിയായ സബിതയ്‌ക്കെതിരെ സെപ്റ്റംബർ 22-ന് അരയിടത്തുപാലത്തെ ഗോകുലം മാളിലെ സൂപ്പർ മാർക്കറ്റിൽ നിന്ന് ആയിരം രൂപയോളം വിലവരുന്ന ചോക്ലേറ്റുകൾ മോഷ്ടിച്ച കേസും നിലവിലുണ്ട്. എസ്ഐ മാരായ അർജുൻ അജിത്ത്, വിനോദ് എന്നിവരുടെ നേതൃത്വത്തിൽ പൊലീസ് സംഘമാണ് പിടികൂടിയത്. കോടതി പ്രതികളെ റിമാൻഡ് ചെയ്തു
പന്തീരാങ്കാവ് പോലീസ് സ്റ്റേഷൻ സബ് ഇൻസ്പെക്ടർമാരായ അർജുൻ അജിത്ത്, വിനോദ്, സിവിൽ പോലീസ് ഓഫീസർ അപർണ, ഹോം ഗാർഡ് ജയരാജ് എന്നിവരടങ്ങിയ സംഘമാണ് അന്വേഷണം നടത്തിയത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.