വെള്ളപ്പൊക്കത്തില്‍ കെട്ടിടത്തിന് നാശനഷ്ടം സംഭവിച്ചിട്ടും മതിയായ നഷ്ടപരിഹാരം നല്‍കാതിരുന്ന ഇന്‍ഷുറന്‍സ് കമ്പനിക്കെതിരെ ജില്ലാ ഉപഭോക്തൃ കമ്മീഷന്‍ വിധി. യഥാര്‍ത്ഥ നഷ്ടത്തിന് പുറമെ കമ്പനിയുടെ ഭാഗത്തു നിന്നുണ്ടായ വീഴ്ചയ്ക്ക് നഷ്ടപരിഹാരമായി 50,000 രൂപയും കോടതി ചെലവായി 10,000 രൂപയും പരാതിക്കാന് നല്‍കാനാണ് വിധി.
തിരൂരിലെ സംഗമം റസിഡന്‍സി കെട്ടിട ഉടമയാണ് പരാതിക്കാരന്‍. 2018 ആഗസ്റ്റ് മാസം രണ്ടാമത്തെ ആഴ്ചയിലുണ്ടായ വെള്ളപ്പൊക്കത്തില്‍ തിരൂര്‍ പുഴ നിറഞ്ഞ് മൂന്ന് ദിവസം കെട്ടിടം വെള്ളത്തില്‍ മുങ്ങിയിരുന്നു. കെട്ടിടത്തിനകത്തുള്ള കുഴല്‍ കിണര്‍, മോട്ടോര്‍ തുടങ്ങിയവക്ക് സാരമായ കേടുപാടുകള്‍ പറ്റി. കെട്ടിടത്തിന്റെ വരാന്ത വേര്‍പെട്ട നിലയിലായി. ഒരു കോടി എണ്‍പത് ലക്ഷത്തിന് ഇന്‍ഷര്‍ ചെയ്ത കെട്ടിടത്തിന്റെ അറ്റകുറ്റ പണികള്‍ക്കായി 453928 രൂപയാണ് കമ്പനിയോട് പരാതിക്കാരന്‍ ആവശ്യപെട്ടത്. കെട്ടിടത്തിന്റെ ഇന്‍ഷുറന്‍സില്‍ കേവലം കെട്ടിടത്തിന്റെ നാശനഷ്ടങ്ങള്‍ മാത്രമേ വരികയുള്ളുവെന്നും മറ്റൊന്നും അനുവദിക്കാനാവില്ലെന്നും നിലപാടെടുത്ത കമ്പനി 1,42,055 രൂപമാത്രമാണ് അനുവദിച്ചത്. എന്നാല്‍ കെട്ടിടത്തിന്റെ ശരിയായ ഉപയോഗത്തിനായിട്ടുള്ള നിര്‍മ്മിതികളും ഉപകരണങ്ങളും കെട്ടിടത്തിന്റെ ഭാഗമായി കണക്കാക്കി നഷ്ടപരിഹാരം നല്കണമെന്ന് ജില്ലാ ഉപഭോക്തൃ കമ്മീഷന്‍ വിധിച്ചു. കെട്ടിട ഉടമക്ക് യഥാര്‍ത്ഥ നഷ്ടമായി 2,92,332 രൂപ കൂടിയും സേവനത്തിലെ വീഴ്ചവരുത്തിയതിന് 50,000 രൂപ നഷ്ടപരിഹാരമായും 10,000 രൂപ കോടതി ചെലവായും അനുവദിച്ച് ജില്ലാ ഉപയോക്തൃ കമ്മീഷന്‍ വിധിയായി. ഒരു മാസത്തിനകം നഷ്ടപരിഹാരം നല്‍കാത്ത പക്ഷം വിധിസംഖ്യക്ക് പരാതി നല്കിയ തിയ്യതി മുതല്‍ 9 ശതമാനം പലിശയും നല്കണമെന്ന് കെ.മോഹന്‍ദാസ് പ്രസിഡന്റും പ്രീതി ശിവരാമന്‍, സി.വി.മുഹമ്മദ് ഇസ്മായില്‍ എന്നിവര്‍ മെമ്പര്‍മാരുമായ ജില്ലാ ഉപഭോക്തൃ കമ്മീഷന്റെ ഉത്തരവില്‍ പറഞ്ഞു.
സീറ്റ് ഒഴിവ്
മലപ്പുറം സര്‍ക്കാര്‍ വനിതാ കോളേജില്‍ ഒന്നാം വര്‍ഷ ബി.എസ്.സി ബോട്ടണിയില്‍ എസ്.ടി, ഇ.ഡബ്ല്യു.എസ് വിഭാഗങ്ങളിലും ബി.എ ഇംഗ്ലീഷ്, ബി.എ ഇസ്ലാമിക് ഹിസ്റ്ററി, ബി.എസ്.സി ബോട്ടണി, ബി.എസ്.സി കെമിസ്ട്രി കോഴ്‌സുകളില്‍ സ്‌പോര്‍ട്‌സ് ക്വാട്ട വിഭാഗത്തില്‍ രണ്ട് ഒഴിവുകള്‍ വീതവും ഉണ്ട്. കാലിക്കറ്റ് യൂണിവേഴ്‌സിറ്റി യു ജി ക്യാപില്‍ രജിസ്റ്റര്‍ ചെയ്തിട്ടുള്ള വിദ്യാര്‍ത്ഥിനികള്‍ ഒക്ടോബര്‍ 17 ന് മുമ്പായി അസ്സല്‍ യോഗ്യതാ സര്‍ട്ടിഫിക്കറ്റുകളുമായി പ്രിന്‍സിപ്പാള്‍ മുമ്പാകെ ഹാജരാവണം. കൂടുതല്‍ വിവരങ്ങള്‍ക്ക് ഫോണ്‍: 0483 2972200