മലപ്പുറം : നവകേരള സദസ്സിന് വരവറിയിച്ച് മലപ്പുറം മണ്ഡലം സംഘാടക സമിതിയുടെ നേതൃത്വത്തിൽ സൗഹൃദ ഫുട്‌ബോൾ മത്സരം സംഘടിപ്പിച്ചു. കോട്ടപ്പടി സ്‌റ്റേഡിയത്തിൽ നടന്ന മത്സരത്തിൽ മലപ്പുറം ജില്ലാ വെറ്ററൻസ് ടീമും കേരള പോലീസ് വെറ്റൻസ് ടീമും തമ്മിൽ ഏറ്റുമുട്ടി. മത്സരത്തിൽ ഏകപക്ഷീയമായ ഒരു ഗോളിന് മലപ്പുറം ജില്ലാ വെറ്ററൻസ് ടീം വിജയികളായി.
മുൻ സന്തോഷ് ട്രോഫി താരങ്ങളായ ഹബീബ് റഹ്‌മാൻ, റഫീഖ് ഹസ്സൻ, റഷീദ്, സുൽഫീക്കർ, രാജേഷ്, സന്തോഷ്, എഡിസൺ, ഇന്ത്യൻ യൂണിവേഴ്‌സിറ്റി മുൻ ക്യാപ്റ്റൻ സുരേന്ദ്രൻ മങ്കട, ഗാന്ധി യൂണിവേഴ്‌സിറ്റി മുൻ ക്യാപ്റ്റൻ സൈദാലി, കേരള പോലീസ് ക്യാപ്റ്റൻ ഷിംജിത്ത് എന്നിവർ ഇരു ടീമുകളിൽ അണിനിരന്നു.
എ.ഡി.എം എൻ.എം മെഹറലി മത്സരം ഉദ്ഘാടനം ചെയ്തു. സ്‌പോർട്‌സ് കൗൺസിൽ ജില്ലാ പ്രസിഡൻറ് വി.പി. അനിൽ അധ്യക്ഷത വഹിച്ചു. മുൻ സന്തോഷ്‌ട്രോഫി കേരള ടീം ക്യാപ്റ്റൻ ആസിഫ് സഹീർ സമ്മാനദാനം നിർവഹിച്ചു. മുൻ ജില്ലാ പോലീസ് മേധാവി യു അബ്ദുൽ കരീം, മലപ്പുറം ബ്ലോക്ക് ഡവലപ്പ്‌മെൻറ് ഓഫീസർ കെ.എം സുജാത എന്നിവർ സംസാരിച്ചു. വാർഡ് കൗൺസിലർ സുരേഷ് മാസ്റ്റർ സ്വാഗതം പറഞ്ഞ ചടങ്ങിൽ സ്വാഗത സംഘം വൈസ് ചെയർമാൻ കെ.പി ഫൈസൽ നന്ദി പറഞ്ഞു.