ദേശീയ സമ്പാദ്യ പദ്ധതി വകുപ്പിന്റെ മലപ്പുറം ജില്ലയിലെ ഏജൻ്റുമാരുടെ ജില്ലാതല സംഗമമായ ‘മഹിളാ പ്രധാനം 2026’-ത്തോടനുബന്ധിച്ച് സംഘടിപ്പിച്ച ഷോർട് ഡോക്യുമെൻ്ററി മത്സരത്തിൽ മങ്കട ബ്ലോക്കിലെ എം.പി.കെ.ബി.വൈ ഏജൻ്റുമാർ സംയുക്തമായി നിർമ്മിച്ച ‘പ്രകാശിതം’ മികച്ച ഡോക്യുമെൻ്ററിയായി തിരഞ്ഞെടുക്കപ്പെട്ടു. ഡോക്യുമെൻ്ററിയുടെ രചനയും സംവിധാനവും നിർവഹിച്ചത് മങ്കട ബ്ലോക്കിലെ ജനറൽ എക്സ്റ്റൻഷൻ ഓഫീസർ കൂടിയായ വി.കെ.കെ. പ്രസാദ് ആണ്.
കൂട്ടിലങ്ങാടി റെയിൻബോ ഓഡിറ്റോറിയത്തിൽ നടന്ന ചടങ്ങിൽ മലപ്പുറം സർവീസ് സഹകരണ ബാങ്ക് സ്പോൺസർ ചെയ്ത 10,000 രൂപയുടെ ക്യാഷ് അവാർഡ് ബാങ്ക് വൈസ് പ്രസിഡൻ്റ് ഉപ്പൂടൻ ഷൗക്കത്ത് വിതരണം ചെയ്തു. ഡോക്യുമെൻ്ററി മത്സരത്തിലെ സ്പെഷ്യൽ മെൻഷൻ അവാർഡ് തിരൂരങ്ങാടി ബ്ലോക്കിന് ലഭിച്ചു.ദേശീയ സമ്പാദ്യ പദ്ധതി മലപ്പുറം ജില്ലാ ഡെപ്യൂട്ടി ഡയറക്ടർ ഉണ്ണികൃഷ്ണൻ.എം, ജില്ലാ അസിസ്റ്റന്റ് ഡയറക്ടർ ജിതിൻ.കെ.ജോൺ, മങ്കട ബ്ലോക്ക് ഏജന്റ്സ് കൺവീനർ പി.പി.നാരായണിക്കുട്ടി എന്നിവർ ചടങ്ങിൽ സന്നിഹിതരായിരുന്നു.
സീനിയർ ഏജന്റുമാരുടെ അനുഭവക്കുറിപ്പുകൾ, ഫീൽഡ് തല പ്രവർത്തനങ്ങൾ, ഏജന്റുമാരുടെ സാമൂഹിക ഇടപെടലുകൾ,നിക്ഷേപകരുടെ അനുഭവങ്ങൾ, ഏജൻസി പ്രവർത്തനത്തിൽ നേരിടുന്ന വെല്ലുവിളികൾ,ഏജന്റുമാർ പ്രതിനിധാനം ചെയ്യുന്ന ബ്ലോക്ക് പഞ്ചായത്തുകളുടെ പ്രാദേശിക ചരിത്രം എന്നിവയാണ് ഡോക്യുമെൻ്ററികളിലെ പ്രധാന പ്രമേയങ്ങൾ. മത്സരത്തിന്റെ ഭാഗമായി ജില്ലയിലെ വിവിധ ഏജന്റ്സ് യൂണിറ്റുകളിൽ നിന്ന് ലഭിച്ച എല്ലാ ഡോക്യുമെൻ്ററികളും ഏജന്റുമാർ പുതുതായി ആരംഭിച്ച യൂട്യൂബ് ചാനലായ ‘NSD AGENTS FORUM-MALAPPURAM’ ൽ അപ്ലോഡ് ചെയ്തിട്ടുണ്ട്.
ഡോക്യുമെൻ്ററി പ്ലേലിസ്റ്റ് ലിങ്ക്: www.youtube.com/playlist?list=PLmBfPgISII6QrZqYEPRBEgt59m47eZXjk