![](https://tirurangaditoday.in/wp-content/uploads/2024/01/rahul.jpg)
തിരുവനന്തപുരം: യൂത്ത് കോണ്ഗ്രസ് സംസ്ഥാന അധ്യക്ഷന് രാഹുല് മാങ്കൂട്ടത്തിലിനെ പുലര്ച്ചെ വീട്ടിലെത്തി അറസ്റ്റ് ചെയ്ത് പൊലീസ്. സെക്രട്ടറിയേറ്റ് മാര്ച്ച് അക്രമകേസിലാണ് പുലര്ച്ചെ പത്തനംതിട്ട അടൂരിലെ വീട്ടിലെത്തി കന്റോണ്മെന്റ് പൊലീസ് അറസ്റ്റ് ചെയ്തത്. മൂന്ന് കേസുകളാണ് സെക്രട്ടേറിയറ്റ് മാര്ച്ചുമായി ബന്ധപ്പെട്ട് പൊലീസ് രജിസ്റ്റര് ചെയ്തത്. ഈ മൂന്ന് കേസുകളിലും രാഹുല് മാങ്കൂട്ടത്തില് പ്രതിയാണ്. പ്രതിപക്ഷനേതാവ് വി ഡി സതീശന് കേസില് ഒന്നാം പ്രതിയാണ്.
ജാമ്യമില്ലാ വകുപ്പുകള് പ്രകാരമാണ് വി ഡി സതീശന് ഉള്പ്പെടെയുള്ളവര്ക്കെതിരെ കന്റോണ്മെന്റ് പൊലീസ് കേസെടുത്തിരുന്നത്. വി ഡി സതീശന്, ഷാഫി പറമ്പില്, രാഹുല് മാങ്കൂട്ടത്തില് ഉള്പ്പെടെ തിരിച്ചറിഞ്ഞ മുപ്പത് പേരുടെ പേരുകളാണ് എഫ്ഐആറില് ഉള്ളത്. കണ്ടാലറിയാവുന്ന മുന്നൂറിലേരെ പേരും കന്റോണ്മെന്റ് പൊലീസ് രജിസ്റ്റര് ചെയ്ത കേസില് പ്രതികളാണ്.
അതേസമയം പുലര്ച്ചെ വീട്ടില് കയറിയുള്ള പൊലീസ് നടപടിക്കെതിരെ കോണ്ഗ്രസ് പ്രവര്ത്തകര് രംഗത്തെത്തി. വീട് മൊത്തം പൊലീസ് വളയുകയായിരുന്നുവെന്നും ഭീകരവാദിയെ പിടിക്കുന്നതുപോലെയുള്ള നീക്കമാണ് നടന്നതെന്നും കോണ്ഗ്രസ് നേതാക്കള് ആരോപിച്ചു. സംസ്ഥാന വ്യാപകമായി ഇന്ന് പ്രതിഷേധം സംഘടിപ്പിക്കുമെന്ന് യൂത്ത് കോണ്ഗ്രസ് നേതാക്കള് വ്യക്തമാക്കി.
കരിങ്കൊടി പ്രതിഷേധക്കാര്ക്ക് നേരെ ഉണ്ടായ അക്രമങ്ങള്ക്കെതിരെ യൂത്ത് കോണ്ഗ്രസ് നടത്തിയ സെക്രട്ടറിയേറ്റ് മാര്ച്ചില് പ്രതിഷേധക്കാര് മൂന്ന് പൊലീസ് വാഹനങ്ങളുടെ ചില്ല് അടിച്ചുതകര്ത്തിരുന്നു. കന്റോണ്മെന്റ് എസ്ഐ ഉള്പ്പടെ എട്ട് പൊലീസുകാര്ക്കും നിരവധി യൂത്ത് കോണ്ഗ്രസ് പ്രവര്ത്തകര്ക്കും സംഘര്ഷത്തില് പരിക്കേറ്റിരുന്നു. നേരത്തെ കേസില് അറസ്റ്റിലായ യൂത്ത് കോണ്ഗ്രസ് പ്രവര്ത്തകര് 50000 രൂപ കെട്ടിവെച്ചാണ് ജാമ്യത്തിലിറങ്ങിയത്.