താനൂര്‍ പൊലീസ് സ്റ്റേഷനില്‍ യുവാവ് ക്രൂരമര്‍ദ്ദനത്തിനിടയായ സംഭവത്തില്‍ അടിയന്തിര അന്വേഷണം നടത്തി നടപടി സ്വീകരിച്ച് റിപ്പോര്‍ട്ട് സമര്‍പ്പിക്കാന്‍ ഡി.ജി.പിയുടെ ജില്ലാ പൊലീസ് മേധാവിക്ക് നിര്‍ദ്ദേശം മല്‍കി. ഡി.വൈ.എസ്.പി റാങ്കിലുള്ള ഉദ്യോഗസ്ഥനെ കൊണ്ട് അന്വേഷിപ്പിച്ച് പത്ത് ദിവസത്തിനകം അടിയന്തിര അന്വേഷണം നടത്തി നടപടി സ്വീകരിക്കുന്നതിനാണ് നിര്‍ദ്ധേശം നല്‍കിയിട്ടുള്ളത്. തിരൂരങ്ങാടി നിയോജക മണ്ഡലം മുസ്്ലിം യൂത്ത്ലീഗ് ജനറല്‍ സെക്രട്ടറി യു.എ റസാഖിന്റെ പരാതിയിലാണ് നടപടി.
നന്നമ്പ്ര പഞ്ചായത്തിലെ പതിനൊന്നാം വാര്‍ഡ് മുസ്്ലിം യൂത്ത്ലീഗ് പ്രസിഡന്റും തെയ്യാല മങ്ങാട്ടമ്പലം കോളനി സ്വദേശിയുമായ ഞാറക്കാടന്‍ അബ്ദുല്‍സലാമിന്റെ മകന്‍ മുഹമ്മദ് തന്‍വീറിനെ (23)യാണ് താനൂര്‍ പൊലീസ് ക്രൂരമായി മര്‍ദ്ദിച്ചതായി പരാതി ഉള്ളത്.
പോലീസ് അക്രമം പുറത്ത് പറഞ്ഞാല്‍ കള്ളക്കേസില്‍ അകത്തിടുമെന്ന ഭീഷണിപ്പെടുത്തിയതായും യുവാവ്. കഴിഞ്ഞ മാസം 28-നായിരുന്നു സംഭവം നടന്നത്.
ഒഴൂരിലെ മണലിപ്പുഴയിലൂടെ ബൈക്കില്‍ മൂന്നുപേരുമായി യാത്ര ചെയ്യുകയായിരുന്ന തന്‍വീറിനെ പൊലീസ് കൈകാണിച്ചു. വണ്ടി നിര്‍ത്തി 1000 രൂപ പിഴ അടക്കാന്‍ പൊലീസ് ആവശ്യപ്പെട്ടു. കയ്യില്‍ 250 രൂപയെ ഒള്ളൂവെന്ന് അറിയിച്ചപ്പോള്‍ 500 രൂപ അടക്കാന്‍ പറഞ്ഞു. എ ടി എം കാര്‍ഡിലാണ് ക്യാഷെന്ന് അറിയിച്ചതോടെ കള്ളം പറയുന്നോ എന്ന് പറഞ്ഞ് പൊലീസ് തെറിവിളിക്കുകയായിരുന്നുവെത്രേ. മരണപ്പെട്ട ഉമ്മയെ തെറിവിളിച്ചത് യുവാവ് ചോദ്യം ചെയ്തതോടെ സജ്ഞു, ശ്രീജിത്ത് എന്നിവര്‍ ചോര്‍ന്ന് യുവാവിനെ ബലമായി പിടിച്ചു പൊലീസ് ജീപ്പില്‍ കയറ്റി സ്റ്റേഷനില്‍ എത്തിച്ചു.
സ്റ്റേഷനിലെ ഇന്‍വെസ്റ്റിഗേഷന്‍ റൂമില്‍ കൊണ്ടിട്ട് നീ പൊലീസിനെ ചോദ്യം ചെയ്യുമോ എന്ന് ചോദിച്ച് മര്‍ദ്ദിക്കുകയായിരുന്നുവത്രെ. പിന്നീടങ്ങോട്ട് വന്ന എല്ലാ പൊലീസുകാരും മുഖത്തും പുറത്തും നാവിക്കും നെഞ്ചത്തും മര്‍ദ്ദിച്ചതായി പറയുന്നു. ശ്രീജിത്ത്, സജ്ഞു എന്നിവര്‍ നാവിക്ക് ഷൂ ഇട്ട് ചവിട്ടുകയും കാല് മടക്കി കാലിനടിയില്‍ ലാത്തി കൊണ്ട് അടിക്കുകയും ചെയ്തു. ശേഷം സ്റ്റേഷനിലെത്തിയ എസ്.ഐ കണ്ണിലും ലിംഗത്തിലും കുരുമുളക് സ്്രേപ ചെയ്തതായും യുവാവ് പറഞ്ഞു. നെഞ്ചത്ത് ലാത്തി കൊണ്ട് കുത്തുകയും ചെകിടത്ത് അടിക്കുകയും ചെയ്തു.
രാത്രി ഒന്‍പത് മണിയോടെ ഇന്‍വെസ്റ്റി ഗേഷന്‍ റൂമിന് പുറത്തെക്കിറക്കിയ തന്‍വീറിനെ കാമറ ഇല്ലാത്ത സ്ഥലത്തേക്ക് മാറ്റി റൈറ്ററും മര്‍ദ്ദിച്ചതായും യുവാവ് പറയുന്നു. പൊലീസിനെ തെറിവിളിച്ചു എന്ന വകുപ്പും ചാര്‍ത്തി യുവാവിനെതിരെ കേസ് രജിസ്റ്റര്‍ ചെയ്ത പൊലീ്സ് രാത്രി പതിനൊന്ന് മണിയോടെ ബന്ധുക്കളുടെ ജാമ്യത്തില്‍ യുവാവിനെ വീട്ടിലേക്ക് അയച്ചു. അടുത്ത മാസം ഗള്‍ഫില്‍ പോകാനിരിക്കുന്ന കാര്യാം യുവാവ് പൊലീസിനോട് പറഞ്ഞിരുന്നു.
സ്റ്റേഷനിലെ സംഭവങ്ങള്‍ പുറത്ത് പറഞ്ഞാല്‍ പാസ്പോര്‍ട്ട് കണ്ട്കെട്ടുമെന്നും വിവിധ കേസുകളില്‍ പ്രതിയാക്കി അകത്തിടുമെന്നും പിന്നെ പുറംലോകം കാണാന്‍ കഴിയില്ലെന്നും പറഞ്ഞ് പൊലീസ് ഭീഷണിപ്പെടുത്തി. ഇതോടെ പൊലീസ് മര്‍ദ്ദിച്ച കാര്യം യുവാവ് ആരോടും പറഞ്ഞിരുന്നില്ല. എന്നാല്‍ ഞായറാഴ്ച്ച വൈകീട്ട് ഏഴ് മണിയോടെ യുവാവ് രക്തം ചര്‍ദ്ദിക്കുകയും അസ്വസ്തത അനുഭവപ്പെടുകയും ചെയ്തതോടെ തിരൂരങ്ങാടി താലൂക്ക് ആശുപത്രിയില്‍ യുവാവ് ചികില്‍സ തേടി.
പരിശോധനയില്‍ കാര്യങ്ങള്‍ വിശദീകരിക്കാതിരുന്ന യുവാവിനോട് ഡോക്ടര്‍ വിവിധ ടെസ്റ്റിന് നിര്‍ദ്ധേശിച്ചു. ഈ ടെസ്റ്റുകളില്‍ നെഞ്ചിനും ആന്തരികാവയവത്തിനും പരിക്കേറ്റതായി കണ്ടു. ഒപ്പം ഇ.സി.ജിയിലും വേരിയേഷന്‍ ശ്രദ്ധയില്‍പ്പെട്ട ഡോക്ടര്‍ അടിയന്തിര ചികില്‍സ നല്‍കി 108 ആംബബുലന്‍സ് വിളിച്ചു നല്‍കി മെഡിക്കല്‍ കോളേജിലേക്ക് റഫര്‍ ചെയ്തു. മെഡിക്കല്‍ കോളേജിലെ ചികില്‍സക്ക് ശേഷം വീട്ടില്‍ വിശ്രമിക്കുകയാണ് തന്‍വീര്‍.
ഈ സംബവത്തില്‍ ഡി.ജി.പിക്ക് നല്‍കിയ പരാതിയിലാണ് അന്വേഷണത്തിന് ഉത്തരവിട്ടിരിക്കുന്നത്. പത്ത് ദിവസത്തിനകം അന്വേഷണം പൂര്‍ത്തിയാക്കി നടപടി സ്വീകരിച്ച് പരാതിക്കാരന് രേഖമൂലം മറുപടി നല്‍കി പരാതിക്കാരന്റെ മൊഴി രേഖപ്പെടുത്തി ഡി.ജി.പിക്ക് കൈമാറണമെന്നും ഉത്തരവിലുണ്ട്. കുറ്റക്കാർക്കെതിരെ നടപടി സ്വീകരിക്കും വരെ പോരാട്ടം തുടരുമെന്ന് യു.എ റസാഖ് പറഞ്ഞു.