തിരുവനന്തപുരം : ആരുടെയും നെഞ്ച് തകര്‍ക്കുന്നതായിരുന്നു തെരുവുനായ കടിച്ചതിനു മൂന്നു തവണ പ്രതിരോധ വാക്‌സീന്‍ എടുത്തിട്ടും പേവിഷബാധ സ്ഥിരീകരിച്ച ഏഴു വയസ്സുകാരി നിയാ ഫൈസലിന്റെ മാതാവ് ഹബീറയുടെ പ്രതികരണം. ”ഇനിയും വളര്‍ത്ത്, കുറേ പട്ടികളെ കൂടി വളര്‍ത്ത്. അവിടെ വേസ്റ്റ് ഇടരുത്, ഇടരുതെന്ന് എല്ലാവരോടും പറഞ്ഞു. ഒരു മനുഷ്യനും കേട്ടില്ല. അതു തിന്നാന്‍ വന്ന പട്ടികളാണ് എന്റെ കുഞ്ഞിനെ കടിച്ചുകീറിയത്. ഞാന്‍ ഓടിച്ചെല്ലുമ്പോള്‍ എന്റെ കുഞ്ഞിനെ കടിച്ചുപറിക്കുവാ. അപ്പോഴേ എടുത്തോണ്ടു പോയി ഞാന്‍… എനിക്കിനി കാണാന്‍ പോലുമില്ല…” നെഞ്ചുപൊട്ടിയായിരുന്നു തന്റെ മകളുടെ മരണവാര്‍ത്ത അറിഞ്ഞ് മാതാവ് പറഞ്ഞത്.
വീടിന് സമീപത്ത് മാലിന്യം തള്ളുന്നത് പതിവ് കാഴ്ചയാണ്. നിരവധി തവണ അധികൃതരോട് പരാതി പറഞ്ഞിട്ടും യാതൊരു നടപടിയും ഉണ്ടായില്ല. വീടിന് സമീപത്ത് തെരുവ് നായ ശല്യം രൂക്ഷമാണെന്നും നിയാ ഫൈസലിന്റെ മാതാവ് ഹബീറ തിരുവനന്തപുരം എസ്എടി ആശുപത്രിക്കു മുന്നില്‍ മാധ്യമങ്ങളോട് പറഞ്ഞു.
ഏപ്രില്‍ 8നാണ് നിയയ്ക്ക് നായയുടെ കടിയേറ്റത്. വിളക്കുടി കുടുംബാരോഗ്യ കേന്ദ്രത്തിലും പുനലൂര്‍ താലൂക്ക് ആശുപത്രിയിലും എത്തിച്ച് വാക്‌സീന്‍ എടുത്ത കുട്ടിക്ക് തുടര്‍ന്നു രണ്ടാമത്തെയും മൂന്നാമത്തെയും ഡോസുകളും എടുത്തിരുന്നു. 29ന് പനി ബാധിച്ച് ആദ്യം താലൂക്ക് ആശുപത്രിയിലും പിന്നീട് എസ്എടിയിലേക്കും കൊണ്ടു വരികയായിരുന്നു. ഞരമ്പില്‍ കടിയേറ്റ്, പേവിഷം രക്തത്തിലൂടെ തലച്ചോറിനെ ബാധിച്ചെന്നാണ് ആശുപത്രി അധികൃതര്‍ പറഞ്ഞത്. എസ്എടി ആശുപത്രി അത്യാഹിത വിഭാഗത്തില്‍ ചികിത്സയിലിരിക്കെ ഇന്നു പുലര്‍ച്ചെയാണ് നിയയുടെ മരണം. കുട്ടി പേവിഷബാധയേറ്റു മരിച്ച സാഹചര്യത്തില്‍ കുട്ടിയുടെ മാതാവ് ഹബീറയ്ക്ക് ക്വാറന്റീന്‍ നിര്‍ദേശം നല്‍കിയിട്ടുണ്ട്. നിയയുടെ മൃതദേഹം വീട്ടിലെത്തിച്ചില്ല. പൊതുദര്‍ശനവും ഉണ്ടായില്ല. ആലഞ്ചേരി മുസ്ലിം ജമാഅത്ത് പള്ളിയില്‍ പ്രോട്ടോക്കോള്‍ പ്രകാരം നിയയുടെ കബറടക്കം നടത്തി.