തിരൂരങ്ങാടി: കൊളപ്പുറം എസ്ബിഐ ബാങ്കിന് പിറക് വശത്തെ പറമ്പില്‍ മൃതദേഹം കണ്ടെത്തി. തൃശൂര്‍ സ്വദേശിയും 20 വര്‍ഷമായി തമിഴ്‌നാട്ടില്‍ താമസക്കാരനുമായ തിരുവള്ളൂര്‍ മൊഗപ്പൈന്‍ ഈസ്റ്റ് സ്വദേശി എം ഉണ്ണികൃഷ്ണന്‍(52) നെയാണ് മരിച്ച നിലയില്‍ കണ്ടെത്തിയത്. സമീപവാസികളാണ് ആളൊഴിഞ്ഞ പറമ്പില്‍ മൃതദേഹം കിടക്കുന്നത് കണ്ടത്. തുടര്‍ന്ന് വേങ്ങര പോലീസില്‍ വിവരമറിയിക്കുകയായിരുന്നു.
ഇന്ന് പതിനൊന്നുമണിയോടെയാണ് മൃതദേഹം കണ്ടത്. ഇയാളെ കഴിഞ്ഞ ദിവസങ്ങളില്‍ കൊളപ്പുറത്ത് കണ്ടിട്ടുണ്ടായിരുന്നതായി ചിലര്‍ പറയുന്നു. എന്നാല്‍ എന്തിനാണ് വന്നതെന്നോ എവിടേക്കാണ് വന്നതെന്നോ എന്നതിനെ കുറിച്ച് വ്യക്തതയില്ല. അതേസമയം സമീപവാസികള്‍ വിവരമറിയിച്ചതിനമെ തുടര്‍ന്ന് വേങ്ങര പോലീസ് സ്ഥലത്തെത്തി ഇന്‍ക്വസ്റ്റ് നടപടികള്‍ ആരംഭിച്ചിരിക്കുകയാണ്.
തൃശൂര്‍ സ്വദേശിയായ ഇയാള്‍ 20 വര്‍ഷത്തോളമായി തമിഴ്‌നാട്ടിലാണ് താമസം എന്നാണ് അറിയാന്‍ സാധിക്കുന്നത്. ഇയാളുടെ ബാഗില്‍ നിന്നും ആധാര്‍, വോട്ടര്‍ ഐഡി എന്നിവ കണ്ടെത്തി. ഇതില്‍ നിന്നാണ് ആളെ തിരിച്ചറിഞ്ഞത്. ഇയാളുടെ ബാഗില്‍ നിന്ന് ലഭിച്ച വിവരത്തിന്റെ അടിസ്ഥാനത്തില്‍ പോലീസ് ബന്ധുക്കളുമായി ബന്ധപ്പെട്ടതായാണ് വിവരം.