തിരുവനന്തപുരം: ഡിജിപി ഓഫീസിലേയ്ക്ക് കെപിസിസി നടത്തിയ മാര്ച്ചിനെതിരായ പൊലീസ് നടപടിയില് പ്രതിഷേധിച്ച് നവകേരള ബസ് കടന്നുപോകുന്ന വഴിയില് കറുത്ത വസ്ത്രങ്ങളിഞ്ഞ് പുതുപ്പള്ളി എംഎല്എ ചാണ്ടി ഉമ്മന്റെ ഒറ്റയാള് പ്രതിഷേധം. തിരുവനന്തപുരത്തെ പുതുപ്പള്ളി ഹൗസിന് സമീപമാണ് ചാണ്ടി ഉമ്മന് പ്രതിഷേധിക്കുന്നത്. പ്രതിഷേധം അവസാനിപ്പിക്കണമെന്നാവശ്യപ്പെട്ട് ഡിവൈഎഫ്ഐ പ്രവര്ത്തകര് രംഗത്തെത്തിയിട്ടുണ്ട്. സമീപത്ത് പൊലീസുകാരും നിലയുറപ്പിച്ചിട്ടുണ്ട്.
കെഎസ്യു – യൂത്ത് കോണ്ഗ്രസ് പ്രവര്ത്തകര്ക്കെതിരായ പൊലീസിന്റെയും സിപിഎമ്മിന്റെയും ആക്രമണത്തില് പ്രതിഷേധിച്ചാണ് ഡിജിപി ഓഫീസിലേക്ക് കെപിസിസി മാര്ച്ച് നടത്തിയത്. ഇത് സംഘര്ഷത്തില് കലാശിക്കുകയായിരുന്നു. പ്രതിഷേധ മാര്ച്ച് കെപിസിസി പ്രസിഡന്റ് കെ സുധാകരനാണ് ഉദ്ഘാടനം ചെയ്തത്.
പ്രതിപക്ഷ നേതാവ് വി ഡി സതീശന് പ്രസംഗിച്ചുകൊണ്ടിരുന്നപ്പോള് പ്രവര്ത്തകര് ബാരിക്കേഡിന് മുകളില് കയറാന് ശ്രമിച്ചു. ഇതിന് പിന്നാലെ പൊലീസ് ജലപീരങ്കിയും ടിയര് ഗ്യാസുകള് പ്രയോഗിക്കുകയായിരുന്നു. കോണ്ഗ്രസ് നേതാക്കള് സംസാരിച്ച വേദിയുടെ പിന്നിലാണ് ടിയര് ഗ്യാസുകള് വന്നുവീണത്. തുടര്ന്ന് വിഡി സതീശന് പ്രസംഗം പാതിവഴിയില് അവസാനിപ്പിച്ചു. ദേഹാസ്വാസ്ഥ്യത്തെ തുടര്ന്ന് കെ സുധാകരനെ ആശുപത്രിയിലേയ്ക്ക് മാറ്റി. പൊലീസിന് നേരെ വനിതാ നേതാക്കള് അടക്കം കല്ലേറ് നടത്തി.