തിരൂരങ്ങാടി: ദേശീയ അന്തര്‍ദേശിയ തലത്തില്‍ പ്രശസ്തിയാര്‍ജിച്ചതും നാല് പതിറ്റാണ്ടിലേറെയായി മാതൃകാപരമായി പ്രവര്‍ത്തിച്ചു വരുന്നതുമായ ചെമ്മാട്ടെ ദാറുല്‍ ഹുദാ ഇസ്ലാമിക് യൂണിവേഴ്‌സിറ്റിക്കെതിരെ സി.പി.എം നടത്തിയ സമരം അപലപനീയമാന്നെന്ന് സി.എം.പി സംസ്ഥാന സെക്രട്ടറി കൃഷ്ണന്‍ കോട്ടുമല പ്രസ്താവനയില്‍ പറഞ്ഞു. പരിസ്ഥിതി പ്രശ്‌നത്തിന്റെ പേര് പറഞ്ഞ് സി.പി.എം നടത്തിയ പ്രതിഷേധ സമരത്തില്‍ സ്ഥാപനത്തിന്റെ വൈസ് ചാന്‍സലറെ വ്യക്തിപരമായി അധിക്ഷേപിച്ച് നടത്തിയ പ്രസംഗങ്ങള്‍ അങ്ങേയറ്റം അപലപനീയവും പ്രതിഷേധാര്‍ഹവുമാണെന്ന് അദ്ദേഹം പറഞ്ഞു.
ദാറുല്‍ ഹുദയുടെ തൊട്ടടുത്ത് സി.പി.എം പ്രവര്‍ത്തകന്റെ ഉള്‍പ്പെടെ നിരവധി സ്വകാര്യ വ്യക്തികള്‍ വയല്‍ നികത്തി നിര്‍മിച്ച കെട്ടിടങ്ങളും ഉണ്ടെന്നിരിക്കെ കേരളത്തിനകത്തും പുറത്തുമുള്ള അശരണരായ പാവപ്പെട്ട ഇസ്ലാം മത വിശ്വാസികളായ ആയിരക്കണക്കിന് വിദ്യാര്‍ത്ഥികള്‍ക്ക് സൗജന്യമായി മത വിദ്യാഭ്യാസത്തോടൊപ്പം ശാസ്ത്രബോധവും മതേതര ജനാധിപത്യ കാഴ്ചപാടും പകര്‍ന്നു നല്‍കുന്ന ഒരു മാതൃകാ സ്ഥാപനത്തിനെതിരെ നടത്തിയ പ്രതിഷേധം തീര്‍ത്തും രാഷ്ട്രീയ പ്രേരിതമാണെന്ന് കൃഷ്ണന്‍ കോട്ടുമല പറഞ്ഞു.
ദാറുല്‍ഹുദാ ഇസ്ലാമിക് സര്‍വ്വകലാശാല ആരംഭിച്ച കാലം മുതല്‍ നാട്ടുകാരനെന്ന നിലയിലും പൊതു പ്രവര്‍ത്തകനെന്ന നിലയിലും ദാറുല്‍ ഹുദയില്‍ നടന്നുവന്ന നിരവധി പരിപാടികളില്‍ നേരിട്ട് പങ്കെടുത്തിട്ടുള്ള വ്യക്തിയെന്ന നിലയില്‍ ദാറുല്‍ ഹുദയുടെ മാനേജ്മെന്റുമായും വൈസ് ചാന്‍സലര്‍ ഡോ:ബഹാബുദീന്‍ നദ് വിയുമായും ഏറെ സൗഹൃദം പുലര്‍ത്തി വരുന്നയാളാണ് താനെന്നും വ്യത്യസ്ത മത വിഭാഗങ്ങളില്‍പ്പെട്ട വ്യക്തികളുമായി ഏറെ സൗഹൃദം കാത്തുസൂക്ഷിക്കുന്നയാളാണ് വൈസ് ചാന്‍സലറെന്നും സംഘപരിവാറിന്റെ അതേ രീതിയിലാണ് മതവിദ്യാഭ്യാസ സ്ഥാപനങ്ങളോടുള്ള സി.പി. എമ്മിന്റെ ഇപ്പോഴത്തെ സമീപനമെന്നും കൃഷ്ണന്‍ കോട്ടുമല പ്രസ്താവനയില്‍പറഞ്ഞു.