തിരുവനന്തപുരം : സംസ്ഥാനത്ത് പുതുവത്സരം ആഘോഷിക്കാന്‍ ഇരിക്കുന്നവര്‍ ഒറു കാര്യം ശ്രദ്ധിക്കേണ്ടതുണ്ട്. യാത്രകളും മറ്റും മുന്‍കൂട്ടി പ്ലാന്‍ ചെയ്തവര്‍ നാളെ എട്ട് മണിക്ക് മുമ്പായി ഇന്ധനം നിറച്ച് വച്ചോളൂ. സംസ്ഥാനത്ത് പുതുവത്സര തലേന്ന് (31-12-2023) രാത്രി എട്ട് മുതല്‍ മറ്റന്നാള്‍ (01-01-2024) പുലര്‍ച്ചെ ആറു വരെ പെട്രോള്‍ പമ്പുകള്‍ അടച്ചിടും. സംസ്ഥാനത്തെ വിവിധ ജില്ലകളിലായി പെട്രോള്‍ പമ്പുകള്‍ക്കുനേരെ നടക്കുന്ന ഗുണ്ടാ ആക്രമണത്തില്‍ പ്രതിഷേധിച്ചാണ് നടപടിയെന്ന് ഓള്‍ കേരള ഫെഡറേഷന്‍ ഓഫ് പെട്രോളിയം ട്രൈഡേഴ്‌സ് ഭാരവാഹികള്‍ അറിയിച്ചു.
പുതുവത്സര തലേന്ന് രാത്രി മുതല്‍ പുതുവത്സര ദിനത്തില്‍ പുലര്‍ച്ചെ വരെ പെട്രോള്‍ പമ്പുകള്‍ അടച്ചിടുന്നത് ജനങ്ങളെ ബുദ്ധിമുട്ടിലാക്കുമെങ്കിലും ഗുണ്ടാ ആക്രമണത്തിനെതിരെ കര്‍ശന നടപടി വേണമെന്നാണ് വ്യാപാരികള്‍ ആവശ്യപ്പെടുന്നത്. ആശുപത്രികളില്‍ ആക്രമണം നടന്നതിനെ തുടര്‍ന്ന് ജീവനക്കാരെ സംരക്ഷിക്കാനായി സര്‍ക്കാര്‍ നിയമ നിര്‍മാണം നടത്തിയതുപോലെ പമ്പുകളെ സംരക്ഷിക്കാനും നിയമ നിര്‍മാണം നടത്തണമെന്നാണ് സംഘടനയുടെ ആവശ്യം. സര്‍ക്കാര്‍ നടപടിയെടുത്തില്ലെങ്കില്‍ മാര്‍ച്ച് മുതല്‍ രാത്രി 10 മണിവരെ മാത്രമേ പമ്പുകള്‍ പ്രവര്‍ത്തിക്കൂ.