ലോകകപ്പ് ഫൈനലില് നാടകീയ രംഗങ്ങള്: സ്പെയിൻ ചാമ്പ്യൻമാരായതിന് പിന്നാലെ മൈതാനത്ത് കളിക്കാര് തമ്മില് കയ്യാങ്കളി!
ലോകകപ്പ് ഫുട്ബോള് ഫൈനലില് അർജന്റീനയെ എക്സ്ട്രാ ടൈമില് ഒന്നിനെതിരെ പൂജ്യം ഗോളുകള്ക്ക് തകർത്ത് സ്പെയിൻ തങ്ങളുടെ രണ്ടാം ലോകകിരീടം സ്വന്തമാക്കിയിരുന്നു.
എന്നാല് മത്സരത്തിന്റെ ഫൈനല് വിസില് മുഴങ്ങിയതിന് തൊട്ടുപിന്നാലെ മൈതാനത്ത് ഇരുടീമിലെയും കളിക്കാർ തമ്മില് വലിയ രീതിയിലുള്ള തർക്കവും കയ്യാങ്കളിയുമുണ്ടായി.
അർജന്റീനൻ മധ്യനിര താരം ലിയാൻഡ്രോ പരേഡസും സ്പെയിൻ പ്രതിരോധ താരം എറിക് ഗാർഷ്യയും തമ്മിലുണ്ടായ വാക്കുതർക്കമാണ് സംഘർഷത്തിലേക്ക് നയിച്ചത്. സ്പാനിഷ് താരങ്ങളുടെ കിരീടാഘോഷത്തിനിടയിലേക്ക് പരേഡസ് തള്ളിക്കയറുകയും ഗാർഷ്യയെ തള്ളി താഴെയിടുകയും ചെയ്തു. ഇത് ചോദ്യം ചെയ്യാനെത്തിയ സ്പെയിനിന്റെ യുവതാരം ഗാവിയുടെ മുഖത്ത് പരേഡസ് അടിക്കുകയും ചെയ്തതോടെ രംഗം വഷളായി.
ഇരുടീമിലെയും പകരക്കാരായ കളിക്കാരും പരിശീലകരും മൈതാനത്തേക്ക് ഓടിയെത്തിയാണ് ഒടുവില് രംഗം ശാന്തമാക്കിയത്. അർജന്റീനൻ പരിശീലകൻ ലയണല് സ്കലോണി സ്വന്തം കളിക്കാരെ തടഞ്ഞുമാറ്റി സമാധാനം പുനഃസ്ഥാപിക്കാൻ ശ്രമിച്ചെങ്കിലും സംഭവത്തിന് പിന്നാലെ റഫറി സ്കലോണിക്ക് ചുവപ്പ് കാർഡ് നല്കി. മത്സരത്തിന്റെ 90-ാം മിനിറ്റില് അർജന്റീനൻ താരം എൻസോ ഫെർണാണ്ടസ് രണ്ടാം മഞ്ഞക്കാർഡ് കണ്ട് പുറത്തുപോയതിനാല് 10 പേരുമായാണ് അർജന്റീന എക്സ്ട്രാ ടൈം കളിച്ചത്. എക്സ്ട്രാ ടൈമിന്റെ 106-ാം മിനിറ്റില് ഫെറാൻ ടോറസ് നേടിയ ഗോളിലാണ് സ്പെയിൻ ചരിത്ര വിജയം സ്വന്തമാക്കിയത്. സ്പാനിഷ് താരങ്ങള് പിന്നീട് റണ്ണേഴ്സ് അപ്പായ അർജന്റീനൻ ടീമിനായി ഗാർഡ് ഓഫ് ഓണർ നല്കിയാണ് മെഡല് വേദിയിലേക്ക് ആനയിച്ചത്. കയ്യാങ്കളിയെ സോഷ്യൽ മീഡിയയിൽ വലിയ ട്രോളാണ് ലഭിച്ചു കൊണ്ടിരിക്കുന്നത്. ഇന്ത്യയിൽ തിരഞ്ഞെടുപ്പിൽ തോറ്റൽ രാഷ്ട്രീയക്കാർ ചെയ്യുന്ന പണിയാണ് എന്നാണ് സോഷ്യൽ മീഡിയയിൽ മിക്കവരും ട്രോളിയത്. സാധാരണ ലോക്കല് സെവൻസിൽ തോറ്റവർ കാണിക്കുന്ന പണിയാണ് ഇതെന്നും മറ്റു ചിലർ സോഷ്യൽ മീഡിയയിൽ കുറിച്ചിട്ടുണ്ട്.