പരപ്പനങ്ങാടി : സീബ്രാ ലൈനുകള്‍ മാഞ്ഞതിനാല്‍ റോഡ് മുറിച്ചു കടക്കാന്‍ പ്രയാസപ്പെട്ട് കാല്‍നട യാത്രക്കാര്‍. പരപ്പനങ്ങാടി ബി എം സ്‌കൂള്‍ പരിസരം, പരപ്പനങ്ങാടി ടൗണ്‍, നഹാസ് ഹോസ്പിറ്റലില്‍ തുടങ്ങിയ ഭാഗങ്ങളിലാണ് സീബ്രാ ലൈനുകള്‍ മാഞ്ഞത്. തിരൂര്‍- കടലുണ്ടി റോഡില്‍ മിക്കയിടത്തും സീബ്രാ ലൈന്‍ മാഞ്ഞു പോയിരിക്കുകയാണ്. ചില സ്ഥലങ്ങളില്‍ പകുതി മാത്രമാണുള്ളത്.
പരപ്പനങ്ങാടി ടൗണുകളില്‍ റോഡിനപ്പുറം കടക്കാന്‍ വഴിയാത്രക്കാര്‍ പ്രയാസപ്പെടുകയാണ്. സീബ്രാ ലൈന്‍ എവിടെയെന്നറിയാതെ വഴിയാത്രക്കാരും സീബ്രാ ലൈനാണെന്നറിയാതെ ഡ്രൈവര്‍മാരും ആശയക്കുഴപ്പത്തിലാണ്. വയോധികരും സ്ത്രീകളും കുട്ടികളുമാണ് റോഡ് മുറിച്ചു കടക്കാന്‍ ഏറെ പ്രയാസപ്പെടുന്നത്.
ഇതിനു പരിഹാരം കാണണമെന്ന് ആവശ്യപ്പെട്ട് സാമൂഹിക പ്രവര്‍ത്തകനും വാഹനാപകട നിവാരണ സമിതി മലപ്പുറം ജില്ലാ സെക്രട്ടറിയുമായ അബ്ദുല്‍ റഹീം പൂക്കത്ത് അസി: എന്‍ജിനീയര്‍ക്ക് പരാതി നല്‍കി അടിയന്തരമായി സീബ്ര ലൈന്‍ മാറ്റി വരക്കണമെന്ന് ആവശ്യപ്പെട്ടു.