തിരൂരങ്ങാടി: നിയമസഭാ തിരഞ്ഞെടുപ്പിന്റെ ആവേശത്തിലേക്ക് മണ്ഡലം കടക്കുമ്പോൾ, വോട്ടർമാരെ നേരിൽ കണ്ട് പിന്തുണ തേടുന്ന തിരക്കിലാണ് എൽ.ഡി.എഫ് സ്ഥാനാർത്ഥി അജിത്ത് കൊളാടി. പുലർച്ചെ മുതൽ രാത്രി വൈകുന്നത് വരെ നീളുന്ന സജീവമായ പ്രചരണ പരിപാടികളാണ് മണ്ഡലത്തിലുടനീളം നടക്കുന്നത്. രാവിലെ 6 മണിക്ക് പരപ്പനങ്ങാടി അഞ്ചപ്പുരയിലെ MEC 7 വ്യായാമ കേന്ദ്രം സന്ദർശിച്ചുകൊണ്ടാണ് സ്ഥാനാർത്ഥി തന്റെ പര്യടനം ആരംഭിച്ചത്. വ്യായാമത്തിനെത്തിയ യുവാക്കളുമായും മുതിർന്നവരുമായും അദ്ദേഹം ആശയവിനിമയം നടത്തി. നിയാസ് പുളിക്കലകത്ത്, ലത്തീഫ് തെക്കേപ്പാട്ട് തുടങ്ങിയ പ്രമുഖ എൽഡിഎഫ് നേതാക്കളും അദ്ദേഹത്തോടൊപ്പമുണ്ടായിരുന്നു. തുടർന്ന് പെരുമണ്ണ പഞ്ചായത്തിലെ കരിക്കപ്പാറ കണ്ടിലകത്ത് ക്ഷേത്രത്തിലെ ഉത്സവ പരിപാടികളിൽ അജിത്ത് കൊളാടി പങ്കെടുത്തു. ഉത്സവത്തിനെത്തിയ വിശ്വാസികളെയും നാട്ടുകാരെയും കണ്ട് അദ്ദേഹം വോട്ടഭ്യർത്ഥിച്ചു.
രാത്രി 8 മണിക്ക് കുരിയാട് നടന്ന അഖിലേന്ത്യ ഫുട്ബോൾ മത്സരത്തിന്റെ ഉദ്ഘാടന ചടങ്ങിൽ അദ്ദേഹം വിശിഷ്ടാതിഥിയായി പങ്കെടുത്തു. കായിക മേഖലയുടെ പുരോഗതിക്കായി എൽഡിഎഫ് മുന്നോട്ടുവെക്കുന്ന വികസന കാഴ്ചപ്പാടുകൾ അദ്ദേഹം പങ്കുവെച്ചു. മണ്ഡലത്തിലെ വികസന മുരടിപ്പിന് അറുതി വരുത്തുമെന്നും, ജനകീയ പ്രശ്നങ്ങളിൽ എപ്പോഴും ഒപ്പമുണ്ടാകുമെന്നും സ്ഥാനാർത്ഥി പര്യടനത്തിനിടെ പറഞ്ഞു. വരും ദിവസങ്ങളിലും കൂടുതൽ കുടുംബ സംഗമങ്ങളിലും പൊതുപരിപാടികളിലും അദ്ദേഹം പങ്കുചേരും.