ഷെഡ്യൂള് റദ്ദാക്കിയത് യാത്രക്കാരനെ കെ.എസ്.ആര്.ടി.സി അറിയിച്ചില്ല ; വെളിമുക്ക് സ്വദേശിക്ക് നഷ്ടപരിഹാരം നല്കാന് ഉപഭോക്തൃ കമ്മീഷന്റെ വിധി
തിരൂരങ്ങാടി : കെ എസ് ആര് ടി സി ബസില് ടിക്കറ്റ് ബുക്ക് ചെയ്ത വെളിമുക്ക് സ്വദേശിയായ യാത്രക്കാരനെ ഷെഡ്യൂള് ക്യാന്സല് ചെയ്ത വിവരം അറിയിക്കാത്തതിന് 20,000 രൂപ നഷ്ടപരിഹാരം നല്കാന് ജില്ലാ ഉപഭോക്തൃ കമ്മീഷന്റെ ഉത്തരവ്. വെളിമുക്ക് പാലയ്ക്കല് സ്വദേശി അഭിനവ് ദാസ് നല്കിയ പരാതിയിലാണ് ജില്ലാ ഉപഭോക്തൃ കമ്മീഷന്റെ വിധി.
2024 ഫെബ്രുവരി 25ന് കാലിക്കറ്റ് യൂണിവേഴ്സിറ്റിയില് രാവിലെ 10ന് മൂവാറ്റുപുഴയിലേക്ക് പോകാനാണ് ലോ ഫ്ളോര് ബസ്സില് 358 രൂപ നല്കി ടിക്കറ്റ് ബുക്ക് ചെയ്തത്. രാവിലെ 9.30ന് ബസ് സ്റ്റോപ്പില് എത്തിയ പരാതിക്കാരന് ഉച്ചയ്ക്ക് ഒരു മണിവരെ ബസ് കാത്തിരുന്നു. ലഭ്യമായ നമ്പറുകളിലെല്ലാം വിളിച്ച് അന്വേഷിച്ചുവെങ്കിലും കൃത്യമായ മറുപടി കെ.എസ്.ആര്.ടി.സിയില് നിന്ന് കിട്ടിയില്ല. ഗുരുതരമായ കാഴ്ചാപരിമിതിയുള്ളയാള് കൂടിയായതിനാല് യാത്രക്കാരന് വലിയ പ്രയാസം അനുഭവിക്കാന് ഇട വന്നു. ഇതിനെ തുടര്ന്നാണ് പര...
