റിയാദ് : സൗദി അറേബ്യയില് മലയാളി കുടുംബം സഞ്ചരിച്ച കാർ നിയന്ത്രണം വിട്ട് മറിഞ്ഞുണ്ടായ ദാരുണമായ വാഹനാപകടത്തില് ഉമ്മയും ഡോക്ടറായ മകളും മരിച്ചു.
മലപ്പുറം കുറ്റിപ്പുറം രാങ്ങാട്ടൂർ നടുവട്ടം തെക്കേ പീടിക്കല് വീട്ടില് അബ്ദുല്ലത്തീഫിന്റെ (കുഞ്ഞുമോൻ) ഭാര്യ രഹന (52), ഇവരുടെ മൂത്ത മകള് ഡോ. നഹ്ല നർമിൻ (29) എന്നിവരാണ് മരണപ്പെട്ടത്. ഖത്തറില് നിന്ന് റോഡ് മാർഗ്ഗം സൗദിയിലെത്തി ഉംറ നിർവ്വഹിച്ച ശേഷം മടങ്ങുകയായിരുന്ന കുടുംബമാണ് അപകടത്തില്പ്പെട്ടത്.
ഞായറാഴ്ച രാത്രി എട്ട് മണിയോടെ ത്വാഇഫില് നിന്നും റിയാദിലേക്കുള്ള എക്സ്പ്രസ്സ് ഹൈവേയില്, റിയാദില് നിന്ന് ഏകദേശം 200 കിലോമീറ്റർ അകലെയുള്ള ‘ദലം’ എന്ന സ്ഥലത്തുവെച്ചായിരുന്നു അപകടം സംഭവിച്ചത്.
റോഡിലൂടെ പറന്നുവന്ന ഒരു വലിയ പ്ലാസ്റ്റിക് ഷീറ്റ് പെട്ടെന്ന് കാറിന്റെ മുൻവശത്തെ വിൻഡ്ഷീല്ഡില് (ഗ്ലാസ്സില്) വന്ന് പതിക്കുകയായിരുന്നു. ഇതോടെ ഡ്രൈവർക്ക് മുന്നോട്ടുള്ള കാഴ്ച പൂർണ്ണമായി മറയുകയും, നിയന്ത്രണം നഷ്ടപ്പെട്ട കാർ ഹൈവേയില് പലതവണ വട്ടംചുറ്റി മറിയുകയുമായിരുന്നു.
വൻ ദുരന്തത്തിനിടയിലും വാഹനത്തിലുണ്ടായിരുന്ന അബ്ദുല്ലത്തീഫ്, ഇവരുടെ മറ്റ് രണ്ട് പെണ്മക്കള്, ഒരു ചെറിയ പേരക്കുട്ടി എന്നിവർ പരിക്കുകളോടെ അത്ഭുതകരമായി രക്ഷപ്പെടുകയായിരുന്നു. ഇവരെ ഉടൻ തന്നെ സമീപത്തെ ആശുപത്രിയിലേക്ക് മാറ്റി.
ദീർഘകാലമായി ഖത്തറില് പ്രവാസിയായ അബ്ദുല്ലത്തീഫ് പ്രമുഖ പൊതുമേഖലാ സ്ഥാപനമായ ഖത്തർ പെട്രോകെമിക്കല് കമ്പനിയിലെ (QAPCO) ഉദ്യോഗസ്ഥനാണ്. അപകടത്തില് മരണപ്പെട്ട രഹന, ഉമർകുട്ടി – മെഹറുന്നിസ കുമ്മത്ത് ദമ്പതികളുടെ മകളാണ്.
നിലവില് അമ്മയുടെയും മകളുടെയും മൃതദേഹങ്ങള് ദലം സെൻട്രല് ആശുപത്രി മോർച്ചറിയില് സൂക്ഷിച്ചിരിക്കുകയാണ്. റിയാദിലെ സാമൂഹിക പ്രവർത്തകരുടെയും കെ.എം.സി.സി ഭാരവാഹികളുടെയും നേതൃത്വത്തില് അന്താരാഷ്ട്ര നിയമനടപടികള് പൂർത്തിയാക്കിയ ശേഷം മൃതദേഹങ്ങള് സൗദി അറേബ്യയില് തന്നെ ഖബറടക്കും.